യുഎന്: ഐക്യരാഷ്ട്രസഭ സുരക്ഷ സമിതിയില് കശ്മീര് വിഷയം ഉന്നയിച്ച പാക്കിസ്ഥാന് കടുത്ത ഭാഷയില് മറുപടി നല്കി ഇന്ത്യ. കൊല്ലപ്പെട്ട അല് ഖ്വയ്ദ നേതാവ് ഒസാമ ബിന് ലാദനെ സല്ക്കരിക്കുകയും അയല്രാജ്യത്തിന്റെ പാര്ലമെന്റ് ആക്രമിക്കുകയും ചെയ്ത ഒരു രാജ്യത്തിന് ഐക്യരാഷ്ട്രസഭ സുരക്ഷ സമിതിയില് ധര്മ്മ പ്രഭാഷണം നടത്താന് ഒരു യോഗ്യതയും ഇല്ലെന്ന് ഇന്ത്യ വ്യക്തമാക്കി. ഇന്ത്യയ്ക്ക് വേണ്ടി വിദേശകാര്യമന്ത്രി എസ് ജയ്ശങ്കറാണ് സുരക്ഷ സമിതിയില് പാക്കിസ്ഥാനെ രൂക്ഷ ഭാഷയില് വിമര്ശിച്ചത്.
പകര്ച്ചവ്യാധി ആയാലും കാലാവസ്ഥ വ്യതിയാനം ആയാലും സംഘര്ഷങ്ങള് ആയാലും ഭീകരവാദം ആയാലും ഓരോ സമയത്തെയും പ്രധാനപ്പെട്ട വെല്ലുവിളികളോട് ഏറ്റവും മികച്ച രീതിയില് എങ്ങനെ പ്രതികരിക്കുന്നു എന്നതിലാണ് ഐക്യരാഷ്ട്രസഭയുടെ വിശ്വാസ്യത കുടികൊള്ളുന്നതെന്ന് വിദേശകാര്യമന്ത്രി ജയ്ശങ്കര് പറഞ്ഞു.
മള്ട്ടിലാറ്ററലിസത്തെ (ബഹുരാഷ്ട്ര കേന്ദ്രീകൃത ലോകക്രമം) പരിഷ്കരിക്കേണ്ടതിന്റെ അനിവാര്യതയ്ക്കാണ് തീര്ച്ചയായും നാമിപ്പോള് ഊന്നല് നല്കുന്നത്. സ്വാഭാവികമായും ഇക്കാര്യത്തില് നമ്മുക്ക് സ്വന്തമായ കാഴ്ചപ്പാടുകള് ഉണ്ടാകും, എന്നാല് ഇത് ഇനിയും നീട്ടിക്കൊണ്ട് പോകരുത് എന്നതിലെങ്കിലും അഭിപ്രായ ഐക്യം ശക്തമാകുന്നുണ്ട്. ഇക്കാര്യത്തില് ഏറ്റവും മികച്ച പരിഹാരങ്ങള് തേടുമ്പോഴും ഭീഷണികളെ സാധാരണവല്ക്കരിക്കുന്നത് ഞങ്ങള്ക്ക് അംഗീകരിക്കാനാകില്ല. ലോകം അംഗീകരിക്കാനാകാത്തതെന്ന് കരുതുന്നതിനെ ന്യായീകരിക്കാനുള്ള ശ്രമങ്ങളെ അനുവദിച്ച് കൊടുക്കരുത്. അതിര്ത്തി കടന്നുള്ള ഭീകരതയെ സ്പോണ്സര് ചെയ്യുന്ന രാജ്യങ്ങള്ക്കും ഇത് ബാധകമാണ്. ഒസാമ ബിന് ലാദന് സല്ക്കാരം നല്കുകയും അയല്രാജ്യത്തിന്റെ പാര്ലമെന്റ് ആക്രമിക്കുകയും ചെയ്തവര്ക്ക് ഈ സുരക്ഷ സമിതി മുമ്പാകെ ധര്മ്മ പ്രഭാഷണം ചെയ്യാന് ഒരു യോഗ്യതയുമില്ല,എസ് ജയ്ശങ്കര് പറഞ്ഞു.
പതിനെട്ട് വര്ഷങ്ങള്ക്ക് മുമ്പ് ഒരു ഡിസംബര് 13നാണ് പാക്കിസ്ഥാനില് പ്രവര്ത്തിക്കുന്ന ഭീകരസംഘടനയായ ലഷ്കര് ഇ തൊയ്ബയുടെ ഭീകരവാദികളും ജെയ്ഷെ മുഹമ്മദ് തീവ്രവാദികളും ഇന്ത്യന് പാര്ലമെന്റ് ആക്രമിക്കുകയും ഒമ്പതുപേരെ കൊലപ്പെടുത്തുകയും ചെയതത്.
ഭീകരവാദത്തെ എതിര്ക്കല്, പരിഷ്കൃത മള്ട്ടിലാറ്ററലിസം എന്നീ വിഷയങ്ങളിലുള്ള സുപ്രധാന പരിപാടികള്ക്ക് അധ്യക്ഷത വഹിക്കുന്നതിനാണ് എസ് ജയ്ശങ്കര് ഐക്യരാഷ്ട്രസഭ ആസ്ഥാനത്ത് എത്തിയത്. നിലവില് ഐക്യരാഷ്ട്രസഭ സുരക്ഷ സമിതിയുടെ അധ്യക്ഷ സ്ഥാനത്തുള്ള ഇന്ത്യയുടെ നേതൃത്വത്തിലാണ് ഈ പരിപാടികള് നടക്കുന്നത്.
Discussion about this post