പ്രായമാകുമ്പോൾ ഒർമ്മക്കുറവും പാർക്കിൻസൺസ് തുടങ്ങി തലച്ചോറിനെ ബാധിക്കുന്ന അസുഖങ്ങൾ ഉണ്ടാകുന്നതും സർവ്വ സാധാരണമാണ്. എന്നാൽ ഇന്ന് യുവാക്കളിലും എന്തിന് കുട്ടികളിലുംവരെ തലച്ചോറിന്റെ പ്രവർത്തനങ്ങളെ ബാധിക്കുന്ന അസുഖങ്ങൾ കണ്ടുവരുന്നുണ്ട്. ഓർമ്മക്കുറവ് ആണ് ഇതിൽ പ്രധാനം. എല്ലാവർക്കും ഓർമ്മക്കുറവ് ഉണ്ടാകാറുണ്ട്. എന്നാൽ ഇത് ദൈനംദിന ജീവിതത്തെയും ആരോഗ്യത്തെയും ബാധിക്കാൻ ആരംഭിച്ചാൽ ഗൗരവമായി തന്നെയെടുക്കണം.
ഭക്ഷണരീതി, ജീവിത ശൈലി, പരിസ്ഥിതി എന്നിവയിൽ വന്ന് ചേർന്നിരിക്കുന്ന മാറ്റങ്ങൾ എന്നിവയാണ് നമ്മുടെ തലച്ചോറിന്റെ പ്രവർത്തനത്തെ ഇന്ന് പ്രതികൂലമായി ബാധിച്ചിരിക്കുന്ന പ്രധാന ഘടകങ്ങൾ. ഭക്ഷണത്തിലും ജീവിത രീതിയിലുമെല്ലാം അൽപ്പമൊന്ന് ശ്രദ്ധിച്ചാൽ തലച്ചോറിനെ എല്ലായ്പ്പോഴും ആരോഗ്യത്തോടെ കാത്തുസൂക്ഷിക്കാനാകും.
ചില പഴങ്ങൾ, പച്ചക്കറികൾ, നട്ട്സ്, ധാന്യങ്ങൾ, മുട്ട, മീൻ എന്നിവ തലച്ചോറിന്റെ ആരോഗ്യത്തിന് ഏറെ മികച്ചതാണ്. അതിനാൽ ഇവ നിത്യേന ഭക്ഷണത്തിൽ ഉൾപ്പെടുത്താൻ ശ്രദ്ധിക്കണം. ബ്രോക്കോളി, ക്യാബേജ് എന്നിവ നമ്മുടെ ഓർമ്മ ശക്തി വർദ്ധിപ്പിക്കുന്നതിനും തലച്ചോറിന്റെ പ്രവർത്തനം ത്വരിതപ്പെടുത്തുന്നതിനും ഏറെ സഹായകമാണ്. ബ്ല്യൂബെറി, വാഴപ്പഴം, അവക്കാഡോ എന്നിവ നിത്യേന ഭക്ഷണത്തിൽ ഉൾപ്പെടുത്തുന്നതും തലച്ചോറിന്റെ ആരോഗ്യം വർദ്ധിപ്പിക്കും.
എള്ള് , വെള്ളക്കടല, നട്സ് എന്നിവയും നിത്യേന കഴിക്കാം. ഒമേഗ 3 ഫാറ്റി ആസിഡിന്റെ കലവറയായ കിളി മീൻ ഭക്ഷണത്തിൽ ഉൾപ്പെടുത്തുന്നതും ഗുണം ചെയ്യും. ഓർമ്മ ശക്തി വർദ്ധിപ്പിക്കാൻ ആഗ്രഹിക്കുന്നവർ മുട്ടയുടെ മഞ്ഞക്കരു നിത്യേന കഴിക്കുന്നത് നല്ലതാണ്. ഭക്ഷണം പാകം ചെയ്യാനും മറ്റും ഒലീവ് ഓയിൽ ഉപയോഗിക്കുന്നതും ഗുണം ചെയ്യും.
തലച്ചോറിന് മതിയായ അളവിൽ ഓക്സിജൻ ലഭിക്കാതിരിക്കുന്നത് പ്രവർത്തനങ്ങളെ ബാധിക്കും. വ്യായാമത്തിലൂടെ ഈ പ്രശ്നം പരിഹരിക്കാം. പ്രഭാത ഭക്ഷണം ഒഴിവാക്കൽ, അതിമ ഭക്ഷണം, പുകവലി, മദ്യപാനം എന്നിവ തലച്ചോറിന്റെ പ്രവർത്തനങ്ങളെ പ്രതികൂലമായി ബാധിക്കുന്ന ഘടകങ്ങളാണ്. അതിനാൽ ഇക്കാര്യങ്ങൾ ഒഴിവാക്കണം.
മതിയായ വിശ്രമം തലച്ചോറിന് നൽകേണ്ടത് ആവശ്യമാണ്. അതിനാൽ നന്നായി ഉറങ്ങണം. ഉച്ചയ്ക്ക് ലഘു നിദ്രയെടുക്കുന്നതും തലച്ചോറിന് ഏറെ ഗുണം ചെയ്യും. ഉറങ്ങുമ്പോൾ തലവഴി മൂടിപുതച്ച് ഉറങ്ങുന്നത് ഒഴിവാക്കണം. ഇത് കൂടുതൽ കാർബൺഡൈ ഓക്സൈഡ് ശ്വസിക്കാൻ കാരണമാകും.
Discussion about this post