ബീജിംഗ്: ഭൂമിയുടെ ഉൾക്കാമ്പായ ഇന്നർകോർ ഇടയ്ക്ക് കറക്കം നിർത്തിയെന്നും അതുവരെ കറങ്ങിയ ദിശ മാറ്റി തിരിച്ച് കറങ്ങിയെന്നും ശാസ്ത്രജ്ഞർ. ചൈനയിലെ പീക്കിംഗ് സർവ്വകലാശാലയിൽ നിന്നുള്ള ഗവേഷകരായ യീ യാങ്, ഷിയാഡോങ് സോങ് എന്നിവരാണ് പഠനം നടത്തിയത്. നേച്ചർ ജിയോസയൻസ് ജേണലിലാണ് പഠനം പ്രസിദ്ധീകരിച്ചിരിക്കുന്നത്.
2009ലാണ് ഭൂമിയുടെ അകക്കാമ്പ് അതിന്റെ എതിർദിശയിൽ കറക്കം തുടങ്ങിയത്. 35 വർഷം കൂടുമ്പോൾ ഉണ്ടാകുന്ന ദിശാവ്യതിയാനമാണ് ഇതിന് കാരണം. 80കളിലാണ് ഇതിന് മുൻപ് ഇങ്ങനെ സംഭവിച്ചത്. ഇനി ഇതുപോലൊരു പ്രതിഭാസം 2040ന് ശേഷമായിരിക്കും സംഭവിക്കുന്നത്.
ഭൂമിയുടെ പാളികളെ മൂന്ന് ഭാഗങ്ങളായി ആണ് തിരിച്ചിരിക്കുന്നത്. ഇവ ക്രസ്റ്റ്, മാന്റിൽ, കോർ എന്നിവയാണ്. അകക്കാമ്പിന്റെ ഒരുഭാഗം ഇരുമ്പ് പരലുകളാണെന്നാണ് കരുതപ്പെടുന്നത്. സ്വർണം, കൊബാൾട്ട്, പ്ലാറ്റിനം തുടങ്ങിയ ലോഹങ്ങളും കോറിൽ അടങ്ങിയിരിക്കുന്നു. ഖര, ദ്രാവക ഘടകങ്ങൾ ഇതിനുണ്ട്. ഉയർന്ന മർദ്ദം കാരണം അകക്കാമ്പ് ഖരാവസ്ഥയിൽ കാണപ്പെടുന്നു. ഖരരൂപത്തിലുള്ള ഉൾക്കാമ്പ് വലിയ വേഗതയിൽ ദ്രാവക രൂപത്തിലുള്ള കോർ ഭാഗത്തിനുള്ളിൽ കറങ്ങുന്നുണ്ടെന്ന് 1996ൽ തന്നെ ശാസ്ത്രജ്ഞർ മനസിലാക്കിയിരുന്നു.
