കോവിഡ്-19 ഭീതി തെല്ലൊന്ന് കുറഞ്ഞെങ്കിലും ലോകത്തിന്റെ വിവിധ ഭാഗങ്ങളില്‍ നിന്ന് വരുന്ന കോവിഡ്-19മായി ബന്ധപ്പെടുന്ന റിപ്പോര്‍ട്ടുകള്‍ ഒട്ടും ആശാസ്യകരമല്ല. അമേരിക്കയില്‍ കുട്ടികള്‍ക്കിടയിലും യുവാക്കള്‍ക്കിടയിലും പ്രധാന മരണകാരണമായി കോവിഡ്-19 മാറുന്നുവെന്ന ആശങ്കപ്പെടുത്തുന്ന റിപ്പോര്‍ട്ടാണ് ഓക്സ്ഫര്ഡ് സര്‍വ്വകലാശാലയിലെ വിദഗ്ധര്‍ തയ്യാറാക്കിയിരിക്കുന്നത്. 2021 ആഗസ്റ്റിനും 2022 ജൂലൈയ്ക്കും ഇടയിലെ കാലയളവില്‍ അമേരിക്കയില്‍ റിപ്പോര്‍ട്ട് ചെയ്ത യുവാക്കളുടെയും കുട്ടികളുടെയും മരണങ്ങളില്‍ പ്രധാന മരണകാരണങ്ങളിലൊന്ന് കോവിഡ്-19 ആണെന്നാണ് ഇവരുടെ കണ്ടെത്തല്‍. മൊത്തത്തില്‍ നോക്കിയാല്‍ അമേരിക്കയിലെ കുട്ടികളില്‍ എട്ടാമത്തെ മരണകാരണം കോവിഡ്-19 ആണ്.
ഇതേ കാലയളവില്‍ പകര്‍ച്ചവ്യാധി മൂലം കുട്ടികള്‍ക്കിടയില്‍ റിപ്പോര്‍ട്ട് ചെയ്ത മരണങ്ങളില്‍ ഏറിയ പങ്കും കോവിഡ്-19 ബാധിച്ചിട്ടായിരുന്നു. ഡെല്‍റ്റ, ഒമിക്രോണ്‍ എന്നീ കോവിഡ് വകഭേദങ്ങള്‍ കാരണമുള്ള കോവിഡ് തരംഗസമയത്താണ് ഏറ്റവുമധികം കുട്ടികള്‍ മരിച്ചത്. ഒരു വയസില്‍ താഴെ മാത്രം പ്രായമുള്ള കുട്ടികളെയാണ് രോഗം ഏറ്റവുമധികം ബാധിച്ചത്. ഈ പ്രായത്തിലുള്ള 100,000 കുട്ടികളില്‍ നാല് ശതമാനം എന്ന രീതിയിലായിരുന്നു മരണനിരക്ക്.
നേരത്തെ സൂചിപ്പിച്ച കാലയളവില്‍ അമേരിക്കയില്‍ ഏതാണ്ട് 940,000ത്തിലധികം പേരുടെ മരണം കോവിഡ്-19 മൂലമായിരുന്നുവെന്നാണ് റിപ്പോര്‍ട്ട് പറയുന്നത്. ഇതില്‍ 0-19 നും ഇടയില്‍ പ്രായമുള്ള 1,300 പേരും ഉള്‍പ്പെടുന്നു.
ഓക്സ്ഫര്ഡ് സര്‍വ്വകലാശാലയിലെ കംപ്യൂട്ടര്‍ സയന്‍സ് വിഭാഗം ഗവേഷകര്‍ യുഎസ് സെന്റര്‍ ഫോര്‍ ഡിസീസ് കണ്‍ട്രോള്‍ ആന്‍ഡ് പ്രിവന്‍ഷനില്‍ നിന്നുള്ള വിവരങ്ങളെ ആസ്പദമാക്കിയാണ് ഇത് സംബന്ധിച്ച പഠനം നടത്തിയത്. 0-19നും ഇടയില്‍ പ്രായമുള്ളവരില്‍ ഏട്ടാമത്തെ മരണകാരണം കോവിഡ്-19 ആണെന്നാണ് ഇവരുടെ കണ്ടെത്തല്‍. അസുഖങ്ങള്‍ മൂലമുള്ള മരണങ്ങളില്‍ അഞ്ചാമതും പകര്‍ച്ചവ്യാധി മൂലമുള്ള മരണങ്ങളില്‍ ഒന്നാമതും കോവിഡ്-19 ആണ്.
