ന്യൂഡൽഹി: ഈ വർഷം ജനുവരിയിലെ ജിഎസ്ടി കളക്ഷനിൽ റെക്കോർഡ് വർധന. 1.55 ലക്ഷം കോടി രൂപയാണ് ജനുവരിയിൽ ജിഎസ്ടി വരുമാനമായി ലഭിച്ചത്. കേന്ദ്രധനമന്ത്രാലയമാണ് ഇത് സംബന്ധിച്ചുള്ള കണക്കുകൾ പുറത്ത് വിട്ടത്. ജനുവരി 31ന് വൈകിട്ട് അഞ്ച് മണി വരെയുള്ള കണക്കാണിത്. ഇതുവരെ ലഭിച്ചതിൽ വച്ച് ഏറ്റവും വലിയ രണ്ടാമത്തെ ജിഎസ്ടി വരുമാനമാണിത്.
1.55 ലക്ഷം കോടിയിൽ 28,963 കോടി സിജിഎസ്ടി ഇനത്തിലും 36,730 കോടി എസ്ജിഎസ്ടിയായും 79,599 കോടി ഐജിഎസ്ടി ഇനത്തിലും സമാഹരിച്ചു. ചരക്ക് ഇറക്കുമതിയിൽ നിന്ന് ലഭിച്ച 768 കോടി ഉൾപ്പെടെ 10,630 കോടിയാണ് സെസ് പിരിച്ചത്.
കഴിഞ്ഞ വർഷം ഇതേ കാലയളവിലെ ജിഎസ്ടി വരുമാനത്തേക്കാൾ 24 ശതമാനം കൂടുതലാണ് ഇക്കുറി ജനുവരിയിൽ ലഭിച്ച ജിഎസ്ടി വരുമാനം. നടപ്പു സാമ്പത്തിക വർഷത്തിൽ ഇത് മൂന്നാം തവണയാണ് ജിഎസ്ടി കളക്ഷൻ 1.5 ലക്ഷം മറികടക്കുന്നത്. 2022 ഏപ്രിലിൽ 1.68 ലക്ഷം കോടി ജിഎസ്ടി വരുമാനമായി ലഭിച്ചിരുന്നു.
Discussion about this post