കേരളം വിട്ടുപോകുന്നവർക്ക് കുലംകുത്തി അവാർഡും എസ്‌കേപ്പ് നികുതിയും; വിമാനത്താവളത്തിൽ തടയാൻ നോക്കുകൂലിയും’ചെറുതും’ നൽകി ഡിഫിയെ ഇറക്കും; ഇങ്ങനെയാണോ സഖാവേ യുവാക്കളെ സംസ്ഥാനത്ത് പിടിച്ച് നിർത്തുന്നത് ?

ജനോപകാരപ്രദമായ പുത്തൻ സംസ്ഥാന ബജറ്റ് അവതരണത്തിന് പിന്നാലെ സോഷ്യൽ മീഡിയയ്ക്ക് ഇപ്പോൾ ക്ഷാമകാലമാണെന്ന് തോന്നുന്നു!! ക്യാപ്‌സ്യൂൾ ക്ഷാമം, ന്യായീകരണ ക്ഷാമം, സിദ്ധാന്ത ക്ഷാമം… ആകെ മൊത്തം ദാരിദ്ര്യം. ബാലഗോപാൽ സഖാവിന്റെ പുത്തൻ പരിഷ്‌കാരങ്ങൾ കേട്ട് കുളിരുകയറിയവർ ഒന്ന് സോഷ്യൽ മീഡിയയിലേക്ക് എത്തിനോക്കിയപ്പോൾ അവിടെയും അതിദാരിദ്ര്യം.

എന്തിനും ഏതിനും എഫ്ബി വാളിൽ ഹാഫ് കുക്ക്ഡ് മറുപടിയുമായി നിറഞ്ഞുനിൽക്കുന്ന ചുവപ്പിനെ പ്രണയിച്ചവരെ കാണാനില്ലത്രേ. നാവിറങ്ങിപ്പോയ സൈബർപോരാളികൾ മുങ്ങിയെന്നാണ് അടക്കംപറച്ചിലുകൾ. എന്തായാലും ട്രോളൻമാർക്കിന്നും ചാകരയാണ്. തീരുമ്പോൾ തീരുമ്പോൾ പണി തരാൻ ഇഷ്ടം പോലെ പോരാളികളുള്ളപ്പോൾ പിന്നെന്തിന് ടെൻഷൻ.

ഇന്നലെ മുങ്ങിയ പോരാളികളോട് ട്രോളൻമാർക്ക് ഒറ്റ സ്വരത്തിൽ ഒന്നേ പറയാനുള്ളൂ. ‘മുറുക്കിയുടുക്കാൻ ഒരു മുണ്ടെങ്കിലും തന്നിട്ട് പോണം മിഷ്ടർ’.കരയരുത്, വിമർശിക്കരുത്,ന്യായീകരണ തൊഴിലാളികൾ കരയാനെ പാടില്ല. ദു:ഖം കടിച്ചമർത്തി ചിരിച്ചുകൊണ്ട് ന്യായീകരിക്ക്.

എന്താണിത്ര സങ്കടപ്പെടുന്നത് കണ്ണിൽ കണ്ട എല്ലാത്തിനും വില കൂട്ടിയാൽ എന്താ ? എല്ലാം നല്ലതിനല്ലേ? എത്രെയാന്ന് വച്ചാണ് ഒരു മനുഷ്യനിങ്ങനെ കടം വാങ്ങുക? പൈസ ഇല്ലാതെ എങ്ങനെ വർഷം വർഷം കാറ് മാറ്റും? ‘ചർച്ചകൾക്കായി’ ദുബായിൽ പോകും? വളർന്നുവരുന്ന പിഎച്ച്ഡിക്കാർക്ക് ശമ്പളം കൊടുക്കും? അപ്പോൾ ഇത്തിരി നികുതിയും സെസുമൊക്കം കൂട്ടിയെന്നിരിക്കും. ഹൃദയപക്ഷക്കാരെ ഒന്നു വിശ്വസിക്കൂ എല്ലാം ശരിയാവുമെന്നാണ് സോഷ്യൽ മീഡിയയിലെ പ്രമുഖ സാമ്പത്തിക ശാസ്ത്രജ്ഞൻമാർ വ്യക്തമാക്കിയിരിക്കുന്നത്.

സന്തോഷിക്കാൻ വേറെയും കാര്യങ്ങൾ മാജിക് ബജറ്റിലുണ്ടല്ലോ? കേരളത്തിലെ യുവാക്കളാരും ഇനി നാട് വിട്ട് പോകില്ല. യുവാക്കൾ കേരളം വിടുന്നത് തടയാൻ നടപടികൾ എടുക്കുമെന്നാണ് ബജറ്റിലെ മറ്റൊരു സൂപ്പർ പ്രഖ്യാപനം. സംസ്ഥാനത്ത് ആയിരക്കണക്കിന് തൊഴിലവസരങ്ങളും വ്യവസായ-സ്റ്റാർട്ട്അപ്പ് സൗഹൃദ അന്തരീക്ഷവും ധാരാളമുള്ളത് കൊണ്ട് ആരും യുവാക്കളെ തടയേണ്ട ആവശ്യമില്ല. എന്നിട്ടും അഹങ്കാരം മൂലം നാട് വിട്ട് പോകുന്നവരെ പിടിച്ചുനിർത്താൻ സഖാവ് ഉത്തരവിട്ടത് കൊണ്ട് അതിനുള്ള നീക്കങ്ങളും നമ്മുടെ ഡിഫി തുടങ്ങിക്കഴിഞ്ഞിട്ടുണ്ടെന്നാണ് സൂചന.

കേരളം വിടുന്നവരെ വിമാനത്താവളത്തിൽ നിന്ന് പിടിച്ചുകൊണ്ടുവരിക, വിദേശത്തേയ്ക്ക് പോകുന്നവർക്ക് എസ്‌കേപ്പ് നികുതി ചുമത്തുക, കുലംകുത്തി അവാർഡ് നൽകി മൂലയ്ക്കിരുത്തുക എന്നൊക്കെയാണ് ഡിഫിയുടെ അജണ്ടയിലെ പ്രധാന നിർദ്ദേശങ്ങളത്രേ. നോക്കുകൂലിയും ഒരു ചെറുതും കൊടുത്താൽ ഏറ്റ പണി വെടിപ്പായി ചെയ്യാൻ ഡിഫിക്കറിയാം, അല്ലെങ്കിൽ ഇന്നോവ തിരിക്കും അത്ര തന്നെ. ഇനി ചിലവ് ചുരുക്കാനാണെങ്കിൽ എല്ലാ വിമാനത്താവളത്തിലും മാൻഡ്രേക്ക് ഫ്‌ളെക്‌സ് വയ്ക്കും. ശകുനം ‘ഷൂപ്പറായത്’ കൊണ്ട് പോകുന്നവൻ പച്ച പിടിക്കുമെന്ന് ഉറപ്പ്. അതായത് ഉത്തമാ.. നിങ്ങൾക്ക് ഈ പാർട്ടിയെ കുറിച്ച് ഒരു ചുക്കും അറിയില്ല….!!