നടൻ മമ്മൂട്ടി നടത്തിയ വർണ്ണവിവേചനപരമായ പരാമർശം ഇപ്പോൾ സോഷ്യൽ മീഡിയയിലാകെ ചർച്ചയാവുകയാണ്. കറുപ്പും വെളുപ്പും തമ്മിലുള്ള വ്യത്യാസം എടുത്ത് കാണിക്കുന്ന, കറുപ്പിനെ മോശമായി ചിത്രീകരിക്കുന്ന തരത്തിലുള്ള മമ്മൂട്ടിയുടെ പരാമർശത്തിനെതിരെ വ്യാപക വിമർശനങ്ങളാണ് ഉയരുന്നത്. തന്നെ ചക്കര എന്നാണ് വിളിച്ചത് എന്നും നല്ല വെളുത്ത പഞ്ചസാര എന്ന് വിളിച്ചില്ലെന്നുമാണ് സിനിമ പ്രോമോഷന്റെ ഭാഗമായി നടന്ന പരിപാടിയിൽ താരം പറഞ്ഞത്.
ഒരു ചോദ്യത്തിന് നൽകിയ മറുപടിയായി നടി ഐശ്വര്യ ലക്ഷ്മിയാണ് ”മമ്മൂക്ക ചക്കരയാണ്” എന്ന് പറഞ്ഞത്. എന്നാൽ നല്ല വെളുത്ത പഞ്ചസാരയെന്ന് തന്നെ വിളിക്കില്ലല്ലോ, കറുത്ത ശർക്കര എന്നല്ലേ വിളിക്കൂ എന്ന് മമ്മൂട്ടി മറുപടി നൽകി. ചക്കര എന്ന് പറഞ്ഞാൽ കരിപ്പെട്ടിയാണ്, ആരെങ്കിലും അങ്ങനെ ഒരാളെപ്പറ്റി പറയുമോ. താൻ കരിപ്പെട്ടിയെന്ന് തിരിച്ച് വിളിച്ചാൽ എങ്ങനെയുണ്ടാകും എന്നും മമ്മൂട്ടി ചോദിക്കുന്നുണ്ട്.
ഈ വീഡിയോ പ്രചരിച്ചതോടെ വിമർശനവുമായി നിരവധി പേർ രംഗത്തെത്തുകയായിരുന്നു. ”കറുപ്പ് ഒരു മോശം നിറമല്ല, കറുപ്പിനോട് ഉപമിച്ചാൽ നാണക്കേട് തോന്നേണ്ട കാര്യവുമില്ല. ഡീയർ പഞ്ചാര മമ്മൂക്ക, അപ്ഡേറ്റ് ചെയ്യുമ്പോൾ ഇത്തരം കാര്യങ്ങൾ വിട്ടുപോകാതിരിക്കാൻ ശ്രദ്ധിക്കണം” എന്ന് ചിലർ പ്രതികരിക്കുന്നുണ്ട്. ഇതൊരു ബ്ലാക്ക് ഹ്യൂമറാണെന്നും ചില കമന്റുകൾ വരുന്നുണ്ട്.
