ആൾക്കൂട്ടത്തെ ഭയക്കുക, അല്ലെങ്കിൽ ആൾകൂട്ടത്തിൽ ചേരാൻ ഇഷ്ടമില്ലാതെ ഇരിക്കുക. ഈ അവസ്ഥയിലുള്ള ഒരു വ്യക്തിയെ കേവലം അന്തർമുഖൻ എന്ന് മാത്രം വിശേഷിപ്പിക്കുന്നതിൽ അർത്ഥമില്ല. അത് സോഷ്യൽ ഫോബിയ എന്ന അവസ്ഥയുടെ ഭാഗമാകാം. ഒരു വ്യക്തിയെ സാമൂഹികമായ ജീവിതത്തിൽ നിന്നും വിജയത്തിൽ നിന്നും പിന്തിരിപ്പിക്കുന്ന ഘടകമാണ് സോഷ്യൽ ഫോബിയ. ഒരു കാര്യവും ഇല്ലാതെ സമൂഹത്തോട് ഒരു ഭയം തോന്നുന്ന അവസ്ഥയാണ് ഇത്.മാനസികമായ ഒരു പ്രശ്നമാണിത്. എന്നാൽ ഒരു വ്യക്തി സ്വയം മനസുവച്ചാൽ ഇത് മറികടക്കാൻ സാധിക്കും.
ഒരു പുതിയ സാഹചര്യം അല്ലെങ്കിൽ വ്യത്യസ്ത സാഹചര്യം, പുതിയ ആളുകൾ എന്നീ സന്ദർഭങ്ങളിലെല്ലാം ചെറിയ തോതിലെങ്കിലും എല്ലാവർക്കും തോന്നുന്ന ഒന്നാണ് ഇത്. ആളുകളെല്ലാം നമ്മളെ ശ്രദ്ധിക്കുകയാണ് എന്ന ധാരണയാണ് പ്രധാന കാരണം. സോഷ്യൽ ഫോബിയയെ മറികടക്കാൻ താഴെപ്പറയുന്ന പ്രവർത്തനങ്ങൾ സഹായിക്കും.
1.ഉറച്ച ചിന്തകൾ
പുതിയ വ്യക്തികളെ , സാഹചര്യങ്ങളെ കാണേണ്ടി വരുമ്പോൾ മനസ്സിൽ നെഗറ്റിവിറ്റി വർധിക്കുന്നു. ഇത് അകറ്റുക എന്നതാണ് ആദ്യപടി. മനസിനെ പോസിറ്റിവ് ചിന്തകൾ കൊണ്ട് നിറയ്ക്കുക. ഭയം ജനിപ്പിക്കുന്ന പ്രസ്തുത സാഹചര്യത്തെ അതിജീവിക്കുന്നതിനായി ചെയ്യേണ്ട കാര്യങ്ങൾ എന്തെല്ലാമാണ് എന്ന് സ്വയം വിശകലനം ചെയ്യുക. ഒരു സമൂഹത്തെ അടുത്തറിയുന്നത് മാനസികമായോ, ശാരീരികമായോ യാതൊരുവിധ പ്രശ്നനങ്ങളും ഉണ്ടാക്കുന്നില്ല എന്ന് മനസിലാക്കുക
2.ടെൻഷൻ മറികടക്കുക
വലിയൊരു സമൂഹത്തെ കാണേണ്ടി വരുമ്പോൾ അമിതമായ ഉത്കണ്ഠ, ടെൻഷൻ എന്നിവ വരുന്നതാണ് നിങ്ങളുടെ പ്രശ്നം. അത് മാറ്റിയെടുക്കുക. അതിനായി ചില വ്യായാമ മുറകൾ പരിശീലിക്കുക.കുറേ ആളുകളെ അഭിമുഖീകരിക്കേണ്ട സാഹചര്യത്തിൽ നന്നായി ദീർഘോഛ്വാസമെടുക്കുക. ഇത് നല്ല ഒരു റിലാക്സേഷനു കാരണമാകും.ഇനിയും മനസ്സിൽ ചിന്തകൾ അവശേഷിക്കുന്നുണ്ടെങ്കിൽ ഒന്ന് മുതൽ പത്ത് വരെയും തിരിച്ചും എണ്ണുക. വളരെ മികച്ചൊരു റിലാക്സേഷൻ പ്രാക്ടീസ് ആണ് ഇത്.
3. ഭയത്തോട് പൊരുത്തപ്പെടുക
അകാരണമായ ഭയത്തെ പൊരുതി തോൽപ്പിക്കാൻ നിങ്ങൾക്ക് സാധിക്കുന്നില്ല എങ്കിൽ ആ ഭയത്തോട് പൊരുത്തപ്പെട്ട് മുന്നോട്ട് പോകുക.
നമുക്ക് പേടി തോന്നുന്ന സാഹചര്യങ്ങളിൽ അതുമായി വളരെ സാവധാനത്തിൽ പൊരുത്തപ്പെടുക. ഭയവുമായി പൊരുത്തപ്പെടാൻ സ്വയം തയ്യാറാകുക. ആരോട് സംസാരിക്കുമ്പോഴും അയാളുടെ മുഖത്ത് നോക്കി, കണ്ണുകളിൽ നോക്കിയേ സംസാരിക്കുക. ഇതാണ് സോഷ്യൽ ഫോബിയയെ മറികടക്കുന്നതിനുള്ള ഏറ്റവും മികച്ച വഴി.
Discussion about this post