വയനാട്: കോൺഗ്രസ് നേതാവ് രാഹുൽ ഗാന്ധി ഇന്ന് സ്വന്തം മണ്ഡലമായ വയനാട്ടിൽ. സന്ദർശനത്തിനായി ഇന്നലെ രാത്രിയോടെ അദ്ദേഹം കൽപ്പറ്റയിലെത്തി. പുതുശ്ശേരിയിൽ കടുവയുടെ ആക്രമണത്തിൽ കൊല്ലപ്പെട്ട കർഷകൻ തോമസിന്റെ വീട്ടിൽ രാഹുൽ ഗാന്ധി സന്ദർശനം നടത്തും.
വന്യമൃഗ ശല്യത്താൽ വയനാട്ടിലെ ജനങ്ങൾ ബുദ്ധിമുട്ടുമ്പോൾ തിരിഞ്ഞു നോക്കാതെ ഭാരത് ജോഡോ യാത്രയുമായി മുന്നോട്ട് പോയിരുന്ന രാഹുൽ ഗാന്ധിയ്‌ക്കെതിരെ രൂക്ഷ വിമർശനമാണ് ഉയർന്നിരുന്നത്. ഇതിന്റെ പശ്ചാത്തലത്തിലാണ് പരിപാടി അവസാനിച്ച ശേഷം രാഹുൽ മണ്ഡലത്തിൽ എത്തുന്നത്. സന്ദർശനം പൂർത്തിയാക്കിയ ശേഷം ഇന്ന് രാത്രി തന്നെ രാഹുൽ ഡൽഹിയിലേക്ക് തിരിക്കും.
ഇന്ന് രാവിലെ കൽപ്പറ്റ മണിയങ്കോട് കൈത്താങ്ങ് പദ്ധതിയിൽ നിർമ്മിച്ച വീടുകൾ അദ്ദേഹം സന്ദർശിക്കും. നിർമ്മാണം പൂർത്തിയായ 25 വീടുകളുടെ താക്കോൽ ദാനവും നിർവ്വഹിക്കും. ഇതിന് ശേഷം കളക്ട്രേറ്റിൽ നടക്കുന്ന വിവിധ യോഗങ്ങളിൽ രാഹുൽ ഗാന്ധി പങ്കെടുക്കും.
അതേസമയം സ്വന്തം മണ്ഡലത്തിൽ മണിക്കൂറുകൾ മാത്രം ചിലവഴിക്കാനെത്തുന്ന രാഹുലിനെതിരെ വിമർശനം ഉയർന്നു കഴിഞ്ഞു. അടിസ്ഥാന സൗകര്യമില്ലായ്മയും വന്യമൃഗ ശല്യവും ഉൾപ്പെടെ നിരവധി ഗുരുതരമായ പ്രശ്‌നങ്ങളാണ് വയനാട്ടിലെ ജനങ്ങൾ അനുഭവിക്കുന്നത്. ഇതൊന്നും തന്നെ പരിഹരിക്കാൻ കോൺഗ്രസ് എംപി തയ്യാറാകുന്നില്ലെന്നാണ് ഉയരുന്ന ആക്ഷേപം.
Discussion about this post