കേപ് ടൗൺ: വനിതാ ട്വന്റി 20 ലോകകപ്പിൽ അയർലൻഡിനെതിരെ ഇന്ത്യക്ക് മികച്ച സ്കോർ. ടോസ് നേടി ബാറ്റിംഗ് തിരഞ്ഞെടുത്ത ഇന്ത്യ 20 ഓവറിൽ 6 വിക്കറ്റ് നഷ്ടത്തിൽ 155 റൺസെടുത്തു. ഇന്ത്യക്ക് വേണ്ടി ഓപ്പണർ സ്മൃതി മന്ഥാന അർദ്ധ സെഞ്ച്വറി നേടി. സെഞ്ച്വറി നേടും എന്ന ഘട്ടത്തിൽ, സ്കോർ ഉയർത്താനുള്ള ശ്രമത്തിനിടെ, 87 റൺസുമായി സ്മൃതി പുറത്തായി. 56 പന്തിൽ 9 ബൗണ്ടറികളും 3 സിക്സറുകളും അടങ്ങുന്നതായിരുന്നു സ്മൃതിയുടെ ഇന്നിംഗ്സ്.
ഓപ്പണർ ഷഫാലി വർമ്മ 24 റൺസ് നേടി. ഓപ്പണിംഗ് വിക്കറ്റിൽ ഷഫാലിയും സ്മൃതിയും ചേർന്ന് 9.3 ഓവറിൽ 62 റൺസ് കൂട്ടിച്ചേർത്തു. ജെമീമ റോഡ്രിഗസ് 12 പന്തിൽ 19 റൺസ് നേടി.
ഐറിഷ് താരങ്ങൾ രണ്ട് തവണ സ്മൃതിയുടെ ക്യാച്ചുകൾ കൈവിട്ടത് ഇന്ത്യക്ക് അനുഗ്രഹമായി. അയർലൻഡിന് വേണ്ടി ലോറ ഡിലനി 3 വിക്കറ്റ് വീഴ്ത്തി. ഓർല പ്രെൻഡെർഗസ്റ്റിന് 2 വിക്കറ്റ് ലഭിച്ചു.
