ന്യൂഡൽഹി: തിരഞ്ഞെടുപ്പ് കമ്മീഷൻ നിയമന രീതി മാറ്റി സുപ്രീംകോടതിയുടെ സുപ്രധാന ഉത്തരവ്. മൂന്നംഗ സമിതി പേര് ശുപാർശ ചെയ്യണമെന്നാണ് ഉത്തരവ്. പ്രധാനമന്ത്രി, ലോക്സഭയിലെ പ്രതിപക്ഷ നേതാവ്, സുപ്രീംകോടതി ചീഫ് ജസ്റ്റിസ് എന്നിവർ ചേർന്ന ഒരു സമിതിയാകണം തിരഞ്ഞെടുപ്പ് കമ്മീഷനെ നിയോഗിക്കേണ്ടത് എന്നാണ് ഉത്തരവ്.
തിരഞ്ഞെടുപ്പ് കമ്മീഷനെയും അംഗങ്ങളെയും നിയമിക്കുന്നത് രാഷ്ട്രപതിയാകും. മേൽപ്പറഞ്ഞ മൂന്നംഗ സമിതി ചർച്ച ചെയ്ത് നൽകുന്ന ഉപദേശത്തിന്റെ അടിസ്ഥാനത്തിലാകും നിയമനമെന്നും ഉത്തരവിൽ വ്യക്തമാക്കുന്നു. സുപ്രീംകോടതിയുടെ അഞ്ചംഗ ഭരണഘടാന ബെഞ്ച് ഐക്യകണ്ഠ്യേനയാണ് ഈ ഉത്തരവ് പുറപ്പെടുവിച്ചത്.
തിരഞ്ഞെടുപ്പ് കമ്മീഷന്റെ നിയമന കാര്യത്തിൽ പാർലമെന്റ് പുതിയ നിയമം കൊണ്ടുവരും വരെയാണ് ഈ രീതി തുടരുക എന്ന് ഉത്തരവിൽ വ്യക്തമാക്കിയിട്ടുണ്ട്. ലോക്സഭയിൽ പ്രതിപക്ഷ നേതാവ് ഇല്ലാത്ത സാഹചര്യം വന്നാൽ സഭയിലെ ഏറ്റവും വലിയ കക്ഷിയുടെ നേതാവായിരിക്കും പ്രതിപക്ഷത്തെ പ്രതിനിധീകരിച്ച് സമിതിയിലുണ്ടാകുക.
Discussion about this post