കോഴിക്കോട് : വനിതാ ഡോക്ടറെ പീഡിപ്പിച്ച് നഗ്നദൃശ്യങ്ങൾ സമൂഹമാദ്ധ്യമങ്ങളിലൂടെ പരസ്യമാക്കിയ കേസിൽ പുരുഷ നഴ്സ് അറസ്റ്റിൽ. തൃശൂർ സ്വദേശിയായ നിഷാം ബാബുവിനെ (24)ആണ് കസബ പോലീസ് പിടികൂടിയത്. വനിതാ ഡോക്ടറുടെ പരാതിയിലാണ് നടപടി. കോഴിക്കോട് നഗരത്തിൽ സ്വകാര്യ ആശുപത്രിയിൽ ജോലി ചെയ്തുവരികയായിരുന്നു ഇയാൾ.
മൈസൂരുവിലെ ആശുപത്രിയിൽ പ്രവർത്തിക്കുന്ന മലയാളി ഡോക്ടറാണ് പരാതിക്കാരി. നേരത്തേ ഇവർ ഒന്നിച്ചാണ് മൈസൂരുവിൽ ജോലി ചെയ്തിരുന്നത്. കോയമ്പത്തൂരിൽ കൂടുതൽ മെച്ചപ്പെട്ട ജോലി വാഗ്ദാനംചെയ്ത് ഡോക്ടറെ കോഴിക്കോട് നഗരത്തിലേക്ക് വിളിച്ചുവരുത്തി പീഡിപ്പിച്ചുവെന്നാണ് പരാതി.
ഡിസംബറിലാണ് പീഡനം നടന്നത്. ഇതിന്റെ ചിത്രങ്ങൾ പ്രചരിപ്പിക്കുമെന്ന് ഭീഷണിപ്പെടുത്തി വീണ്ടും വിവിധ ഇടങ്ങളിലെത്തിച്ച് പീഡിപ്പിക്കുകയായിരുന്നു. ഫോണിലൂടെ ശല്യം ചെയ്യുകയും വീണ്ടും ലോഡ്ജിലെത്താൻ ആവശ്യപ്പെടുകയും ചെയ്തതോടെ ഡോക്ടർ ഇയാളുടെ നമ്പർ ബ്ലോക്ക് ചെയ്തു. ഇതിൽ പ്രകോപിതനായ നഴ്സ് ഡോക്ടറുടെ സ്വകാര്യ ദൃശ്യങ്ങൾ സമൂഹമാദ്ധ്യമങ്ങളിൽ പങ്കുവെയ്ക്കുകയായിരുന്നു. ഇതോടെയാണ് വനിതാ ഡോക്ടർ പരാതിയുമായി പോലീസിനെ സമീപിച്ചത്.
Discussion about this post