മുംബൈ: സിനിമാ ചിത്രീകരണത്തിനിടെ സംഭവിച്ച അപകടത്തെ കുറിച്ച് ബോളിവുഡ് താരം അമിതാഭ് ബച്ചൻ. പ്രൊജക്ട് കെ എന്ന സിനിമയുടെ ചിത്രീകരണ വേളയിലാണ് നടന്റെ വാരിയെല്ലിന് പൊട്ടലുണ്ടായത്. പരിക്കുണ്ടെന്നും ചികിത്സയ്ക്ക് ശേഷം വീട്ടിൽ വിശ്രമത്തിലാണെന്നും നടൻ ബ്ലോഗിൽ കുറിച്ചു.
”ഹൈദരാബാദിൽ പ്രൊജക്ട് കെയുടെ ചിത്രീകരണത്തിനിടെ ഒരു ആക്ഷൻ ഷോട്ടിനിടെ എനിക്ക് പരിക്കേറ്റു. തരുണാസ്ഥിക്ക് പൊട്ടലുണ്ട്. വലത് വാരിയെല്ലിൽ പേശീവലിവുമുണ്ട്. ഡോക്ടറെ കൺസൾട്ട് ചെയ്ത് സിടി സ്കാൻ ചെയ്തു. ഹൈദരാബാദിലെ എഐജി ആശുപത്രിയിൽ നിന്നും വീട്ടിലേയ്ക്ക് തിരിച്ചെത്തി വിശ്രമത്തിലാണ്. ചലിക്കാനും ശ്വാസമെടുക്കാനും വേദനയുണ്ട്.. സാധാരണ നിലയിലേയ്ക്കെത്താൻ കുറച്ച് ആഴ്ചകൾ എടുക്കും. വേദനയ്ക്കടക്കം മരുന്നുകളുണ്ടെന്ന് നടൻ തന്റെ ബ്ലോഗിൽ കുറിച്ചു.
പരിക്ക് പൂർണമായും ഭേദമാകും വരെ, എല്ലാ പ്രൊജക്ടുകളും താൻ താത്കാലികമായി നിർത്തിവയ്ക്കുകയാണെന്നും മുംബൈയിലെ വസതിയായ ജൽസയിൽ വിശ്രമത്തിലാണെന്നും നടൻ കുറിച്ചു. അത്യാവശ്യ കാര്യങ്ങൾക്കെല്ലാം ഇപ്പോൾ മൊബൈലിനെയാണ് ആശ്രയിക്കുന്നത് പക്ഷേ എപ്പോഴും കിടപ്പാണ്. ഇത് കുറച്ച് ബുദ്ധിമുട്ടായിരിക്കും. ഈ സാഹചര്യത്തിൽ എനിക്ക് ആരാധകരെ ആരെയും കാണാൻ കഴിയില്ല. അതിനാൽ ആരും ജൽസയുടെ ഗേറ്റിന് മുന്നിൽ വരരുത്.എല്ലാം ശരിയാകുമെന്ന് നടൻ കൂട്ടിച്ചേർത്തു.
