വയറ്റിൽ അൽപ്പം കൂടി സ്ഥലമുണ്ടെങ്കിൽ അത്രയും കൂടി മദ്യം കഴിക്കാം എന്ന ചിന്തയിൽ ഭക്ഷണം ഒഴിവാക്കുന്ന ചില മദ്യപാനികളെ നമ്മളിൽ പലരും കണ്ടിട്ടുണ്ടാവും. മദ്യലഹരിയിൽ, മുന്നിൽ വിളമ്പി വെച്ചിരിക്കുന്ന ഭക്ഷണം തീന്മേശയുടെ മുകളിലും മറ്റും വാരി വെക്കുന്ന ചില മദ്യപാനികളും ഉണ്ട്. ഇവർ എന്താണ് ഇങ്ങനെ ചെയ്യുന്നത് എന്ന് ചിന്തിച്ചിട്ടുണ്ടോ?
ഭക്ഷണം ഒഴിവാക്കി മദ്യപാനം തുടരുന്നത് ഗുരുതരമായ ഒരു ആരോഗ്യ പ്രശ്നത്തിന്റെ സുപ്രധാനമായ ലക്ഷണമാണ്. അരുചിയും ഭക്ഷണത്തോടുള്ള വിരക്തിയും മദ്യപാനാസക്തിയുടെ അപകടകരമായ ഘട്ടമാണ് എന്ന് ആരോഗ്യ വിദഗ്ധർ മുന്നറിയിപ്പ് നൽകുന്നു.
മദ്യാസക്തർക്ക് ആകെ താത്പര്യം കൊഴുപ്പ് നിറഞ്ഞ ഭക്ഷണത്തോടാണ്. അതും മിതമായ അളവിലാണ് അവർ കഴിക്കുക. ഭക്ഷണത്തിന്റെ നിലവാരമൊന്നും അവർ കാര്യമാക്കാറില്ല. ഇതിനുള്ള പ്രധാന കാരണമായി ചൂണ്ടിക്കാണിക്കപ്പെടുന്നത്, ജെലാനിൻ എന്ന ഹോർമോണിന്റെ പ്രവർത്തനമാണ്. മദ്യപിക്കുമ്പോൾ ശരീരത്തിൽ രൂപപ്പെടുന്ന ഈ ഹോർമോണാണ്, കൊഴുപ്പുള്ള ഭക്ഷണം തിരഞ്ഞെടുക്കാൻ മദ്യപ മനസ്സിനെ പ്രേരിപ്പിക്കുന്ന ഘടകം.
ആൽക്കഹോളിക് കീറ്റോഅസിഡോസിസ്– മദ്യപാനാസക്തി എന്ന രോഗാവസ്ഥയിലെ ഗുരുതരമായ ഒരു ഘട്ടമാണ് ആൽക്കഹോളിക് കീറ്റോഅസിഡോസിസ്. ഈ അവസ്ഥയിൽ എത്തിയ രോഗിക്ക്, ഭക്ഷണം കഴിക്കാൻ ഒട്ടും താത്പര്യം തോന്നില്ല. സദാസമയവും മദ്യപിക്കണം എന്ന ചിന്ത മാത്രമായിരിക്കും അയാളെ നയിക്കുക. വിശപ്പില്ലായ്മക്ക് പുറമേ ക്രമം തെറ്റിയ ശ്വാസോച്ഛ്വാസം, ക്ഷീണം, തലകറക്കം, അമിതമായ ദാഹം, തളർച്ച എന്നിവയും ഈ അവസ്ഥയുടെ ലക്ഷണങ്ങളാണ്.
ഈ അവസ്ഥയിൽ എത്തിയ മദ്യപാനിക്ക് ഭക്ഷണം കുറയുന്നതിന്റെ ഭാഗമായി പോഷകങ്ങളുടെ അപര്യാപ്തത ഉണ്ടാകും. ദഹനവ്യവസ്ഥയിൽ ആഗിരണം പലപ്പോഴും തടസപ്പെടുന്നതോടെ, നിത്യരോഗിയായി അയാൾ മാറുന്നു.
ഈ ഘട്ടം കഴിഞ്ഞും പുരോഗമിക്കുന്ന മദ്യപാനം ഗുരുതരമായ കരൾ രോഗത്തിലേക്ക് നിങ്ങളെ നയിക്കും. വിശപ്പില്ലായ്മക്ക് പുറമേ ഭാരക്കുറവ്, മഞ്ഞപ്പിത്തം, എഡിമ, പനി, ചൊറിച്ചിൽ, ബലക്കുറവ്, വയറ്റിൽ വെള്ളം കെട്ടിക്കിടക്കുന്ന അവസ്ഥ, മലത്തിൽ രക്തം എന്നിവയാണ് പ്രാരംഭ ലക്ഷണങ്ങൾ. മദ്യപാനം പൂർണ്ണമായി നിർത്തുക എന്നത് മാത്രമാണ് ഈ അവസ്ഥയിൽ ജീവനോടെ തുടരാനുള്ള ഒരേയൊരു മാർഗം.
അമിത മദ്യപാനം കരളിനൊപ്പം പാൻക്രിയാസിനെയും തകർക്കും. ഇതോടെ ജീവിതം കൂടുതൽ ദുഷ്കരമാകും.
നിങ്ങൾ ഒരു അമിത മദ്യപാനി ആയോ എന്ന് അറിയാനുള്ള ഒരു മാർഗം, ഈ ലക്ഷണങ്ങൾ സ്വയം പരിശോധിക്കുക എന്നതാണ്. ഒറ്റയ്ക്കിരുന്നുള്ള മദ്യപാനം, ബോധക്ഷയം, ചുറ്റുപാടുകളോടുള്ള അവഗണന, മദ്യപാന ശീലത്തെ കുറിച്ച് നുണ പറയുക, ബന്ധങ്ങളുടെ തകർച്ച, പൊതു ഇടങ്ങളിൽ പ്രത്യക്ഷപ്പെടാനുള്ള വൈഷമ്യം, അകാരണമായ തർക്കങ്ങൾ, അപകർഷതാ ബോധം..
മദ്യപാനാസക്തി എന്നത് ചികിത്സ ആവശ്യമായ ഒരു രോഗാവസ്ഥയാണ്. മനസിനും ശരീരത്തിനും നൽകുന്ന കൃത്യമായ ചികിത്സയിലൂടെ ഈ അവസ്ഥയിൽ നിന്നുമുള്ള മോചനം സാദ്ധ്യമാണ്.
Discussion about this post