സ്വന്തമായി ഒരു ആപ്പ് ഉണ്ടാക്കി ലോകത്തിലെ ഏറ്റവും പ്രായം കുറഞ്ഞ ഐഒഎസ് ഡെവലപ്പറെന്ന ബഹുമതി സ്വന്തമാക്കിയ ഒമ്പതുവയസുകാരി ഹനയെ ഓർമ്മയുണ്ടോ അന്ന് ആപ്പിൾ സിഇഒ ടിം കുക്ക് വരെ ഹനയെ അഭിനന്ദിച്ചിരുന്നു. ഇന്നിപ്പോൾ ഹനയുടെ സഹോദരി ലീനയാണ് തലക്കെട്ടുകളിൽ ഇടം പിടിക്കുന്നത്. കൃത്രിമബുദ്ധി അഥവാ എഐ അടിസ്ഥാനമാക്കി നേത്രരോഗങ്ങളും കണ്ണുമായി ബന്ധപ്പെട്ട അവസ്ഥകളും കണ്ടെത്തുന്നതിനുള്ള ആപ്പ് വികസിപ്പിച്ചതാണ് പതിനൊന്നുവയസുകാരിയായ ഈ കൊച്ചുമിടുക്കി കൈവരിച്ച നേട്ടം.
ദുബായിൽ താമസിക്കുന്ന ലീന സ്വന്തമായാണ് കോഡിംഗ് പഠിച്ചത്. പത്ത് വയസ്സുള്ളപ്പോഴാണ് ലീന എഐ ആധാരമാക്കി ഓഗ്ലർ ഐസ്കാൻ എന്ന ആപ്പ് വികസിപ്പിച്ചത്. സവിശേഷമായ സ്കാനിംഗ് പ്രക്രിയയിലൂടെ കണ്ണിലുണ്ടാകുന്ന വിവിധ അസുഖങ്ങളും അവസ്ഥകളും കണ്ടുപിടിക്കാനാകും എന്നതാണ് ഈ ആപ്പിന്റെ പ്രത്യേകത. തിമിരം, മെലനോമ തുടങ്ങിയ അസുഖങ്ങളെല്ലാം ലീന കണ്ടുപിടിച്ച ആപ്പ് വഴി കണ്ടെത്താം. പരിശീലനം ലഭിച്ച മാതൃകകൾ അടിസ്ഥാനമാക്കിയാണ് ആപ്പ് അസുഖങ്ങൾ കണ്ടെത്തുന്നത്. അത്യാധുനിക കംപ്യൂട്ടർ വിഷനും മെഷീൻ ലേണിംഗ് അൽഗോരിതങ്ങളും ഉപയോഗപ്പെടുത്തി പ്രകാശംത്തിന്റെയും നിറങ്ങളുടെയും തീവ്രത, ദൂരം, ഫ്രെയിം പരിധിക്കുള്ളി। കണ്ണിന്റെ സ്ഥാനം കണ്ടെത്തുന്നതിനുള്ള പോയിന്റുകൾ എന്നിവ വിലയിരുത്താൻ ഓഗ്ലറിനാകും. സ്കാനർ ഫ്രെയിമിനുള്ളിൽ തന്നെയാണോ കണ്ണുള്ളത്, പ്രകാശവുമായി ബന്ധപ്പട്ട് എന്തെങ്കിലും പ്രശ്നങ്ങളുണ്ടോ എന്നിവ തിരിച്ചറിയാനും ആപ്പിന് സാധിക്കും. സ്കാനിംഗിന്റെ ഗുണമേന്മ തൃപ്തികരമാണെങ്കിൽ, അതുപയോഗിച്ച് വിവിധ രോഗങ്ങൾക്കുള്ള സാധ്യത ആപ്പ് വിലയിരുത്തും. SwiftUI ഉപയോഗിച്ചാണ് ആപ്പ് വികസിപ്പിച്ചിരിക്കുന്നത്. ഈ ആപ്പ് വികസിപ്പിക്കാൻ ആറുമാസത്തെ ഗവേഷണ, വികസന പ്രവർത്തനങ്ങൾ ആവശ്യമായി വന്നതായി ലീന പറയുന്നു.
തന്റെ ആപ്പ് അംഗീകാരത്തിനായി സമർപ്പിച്ച കാര്യം ലീന തന്നെയാണ് സാമൂഹ്യമാധ്യമങ്ങളിൽ പങ്കുവെച്ചത്. കൊച്ചുമിടുക്കിയുടെ ഈ അത്യപൂർവ്വ നേട്ടത്തെ പ്രശംസിച്ച് നിരവധി പേരാണ് അവളുടെ പോസ്റ്റിന് കമന്റുകൾ ഇട്ടിരിക്കുന്നത്.
