ആഡംബര വാഹനങ്ങൾ നിരത്തിലൂടെ പോകുന്നത് കണ്ടാൽ ആരായാലും നോക്കിനിന്നുപോകും, ഇതുപോലൊരെണ്ണം വാങ്ങാൻ പറ്റിയിരുന്നെങ്കിൽ എന്ന് ആഗ്രഹിക്കുകയും ചെയ്യും. പക്ഷേ അവയുടെ വില കേട്ടാൽ, ഓ നമുക്കതൊന്നും വിധിച്ചിട്ടില്ലെന്ന് നെടുവീർപ്പ് ഇടുകയും ചെയ്യും. പക്ഷേ ചിലരുണ്ട്. ആഗ്രഹിക്കുന്നത് സ്വന്തമാക്കാൻ കഠിനമായി പരിശ്രമിക്കും. ഇനി വേറൊരു കൂട്ടരുണ്ട്. ബുദ്ധിയും കഴിവും ഉപയോഗിച്ച് അതുപോലൊരെണ്ണം സ്വന്തമായങ്ങ് നിർമ്മിക്കും. അത്തരത്തിലുള്ള കണ്ടുപിടിത്തങ്ങൾക്ക് എന്നും മുന്നിലാണ് നമ്മൾ ഇന്ത്യക്കാർ. പറഞ്ഞുവരുന്നത് അടുത്തിടെ ഇന്റെർനെറ്റിൽ വൈറലായ ഒരു ഓട്ടോറിക്ഷയുടെ വീഡിയോയെ കുറിച്ചാണ്. വെറും ഓട്ടോ എന്ന് പറഞ്ഞാൽ പോര, ഇതാണ് കൺവേർട്ടബിൾ ഓട്ടോ.
അടിമുടി മാറ്റം വരുത്തിയ ഈ ഓട്ടോറിക്ഷ അസ്സലൊരു കൺവേർട്ടബിൾ കാറ് പോലെ തന്നെയാണ്. ഓട്ടോറിക്ഷ കേരള എന്ന ഇൻസ്റ്റഗ്രാം പേജ് ആണ് ഈ വീഡിയോ സോഷ്യൽമീഡിയയിൽ പങ്കുവെച്ചത്. ഇതിന്റെ ശിൽപ്പി ആരാണെന്നോ സ്ഥലമേതാണെന്നോ പോലുള്ള വിവരങ്ങൾ വീഡിയോയിൽ ലഭ്യമല്ല. എന്തായാലും ഡ്രൈവർ ഒരു ബട്ടൻ അമത്തുമ്പോൾ ഓട്ടോയുടെ റൂഫ് അകന്ന് മാറുന്നത് വീഡിയോയിൽ കാണാം. പിങ്ക് നിറത്തിലാണ് ഈ ഓട്ടോയും അകവും പുറവും പെയിന്റ് ചെയ്തിരിക്കുന്നത്. പതുപതുത്ത ആഡംബര സീറ്റും പിങ്ക് നിറത്തിലാണ്.
View this post on Instagram
ഏതായാലും സോഷ്യൽ മീഡിയ ഇരുകൈകളും നീട്ടി ഈ വീഡിയോ സ്വീകരിച്ചു. കൺവേർട്ടബിൾ ഓട്ടോയുടെ ശിൽപ്പിയുടെ വൈദഗ്ധ്യത്തെയും ഭാവനയെയും പുകഴ്ത്തി നിരവധിപേരാണ് വീഡിയോയ്ക്ക് കമന്റുകൾ ഇട്ടിരിക്കുന്നത്. ഓട്ടോയിലെ റോൾസ് റോയിസെന്നാണ് ഒരാൾ കമന്റ് ചെയ്തിരിക്കുന്നത്. എനിക്ക് താങ്ങാൻ പറ്റിയ കൺവേർട്ടബിൾ എന്ന് മറ്റൊരാൾ കമന്റ് ചെയ്തിരിക്കുന്നു.
ആഡംബര കാർ പോലെ ഡിസൈൻ ചെയ്ത മറ്റൊരു ഓട്ടോയുടെ വീഡിയോ കഴിഞ്ഞ ആഴ്ച വ്യവസായിയായ ഹർഷ് ഗോയങ്ക പങ്കുവെച്ചിരുന്നു. മഞ്ഞ നിറത്തിലുള്ള ആഡംബര സീറ്റുകളും തിളങ്ങുന്ന കറുത്ത നിറവുമായി റൂഫ് ഇല്ലാത്ത ആ ഓട്ടോ വിന്റേജ് കാറ് പോലെയാണ് ഡിസൈൻ ചെയ്തിരുന്നത്. കഴിഞ്ഞ വർഷം പൊള്ളുന്ന ചൂടിനെ പ്രതിരോധിക്കാൻ ഓട്ടോയുടെ റൂഫിൽ ഒരു മിനി പൂന്തോട്ടം തന്നെ സജ്ജീകരിച്ച ന്യഡെൽഹിയിലെ ഒരു ഓട്ടോയും ജനശ്രദ്ധ നേടിയിരുന്നു.
Discussion about this post