ആളുകളെ ധൈര്യപൂർവ്വം വിഡ്ഢിയാക്കാൻ പറ്റുന്ന ദിനമാണ് ഏപ്രിൽ ഫൂൾസ് ഡേ അഥവാ വിഡ്ഢിദിനം. ഏപ്രിൽ ഒന്നായ നാളെയാണ് ആ സുദിനം. പ്രിയപ്പെട്ടവരെയും അല്ലാത്തവരെയും സുഹൃത്തുക്കളെയുമൊക്കെ ഗംഭീരമായി പറ്റിക്കാനുള്ള ഐഡിയകൾ ആലോചിക്കുന്ന തിരക്കിലായിരിക്കും ഇന്ന് മിക്കവരും. കാലാകാലങ്ങളായി തുടർന്നുവരുന്ന ഈ പറ്റിക്കൽ പരിപാടി ഒരാചാരം പോലെ ലോകമെമ്പാടുമുള്ള ആളുകളും ആഘോഷിക്കാറുണ്ടെങ്കിലും പലർക്കും ഈ വിഡ്ഢിദിനത്തിന്റെ ചരിത്രമോ തുടക്കമോ ഒന്നും അറിയണമെന്നില്ല.
വിഡ്ഢിദിന ചരിത്രവും തുടക്കവും
സത്യം പറഞ്ഞാൽ ‘തുടക്കം’ എന്ന് തലക്കെട്ടിൽ കൊടുത്തതും ഒരു പറ്റിക്കലാണ്! കാരണം വിഡ്ഢിദിനം കൃത്യമായി എന്നുമുതലാണ് ആരംഭിച്ചതെന്ന് ഇപ്പോഴും ആർക്കും അറിയില്ല. എന്തായാലും പോപ്പ് ഗ്രിഗറി പതിമൂന്നാമൻ ഗ്രിഗോറിയൻ കലണ്ടർ അവതരിപ്പിച്ച 1582ന് ശേഷമാണ് ഏപ്രിൽ ഫൂൾസ് ദിനം ആരംഭിച്ചതെന്നാണ് കരുതപ്പെടുന്നത്. ഗ്രിഗോറിയൻ കലണ്ടർ അവതരിപ്പിച്ചതോടെ പുതുവർഷാഘോഷം ജനുവരി ഒന്നിലേക്ക് മാറ്റി. പക്ഷേ ചിലയാളുകൾ അത് അംഗീകരിക്കാതെ ഏപ്രിൽ ഒന്നുതന്നെ പുതുവർഷദിനമായി കണക്കാക്കിപ്പോന്നു. അങ്ങനെ പഴയ കലണ്ടറിൽ തുടർന്നവരെ കളിയാക്കുന്ന ഏർപ്പാടാണ് പിന്നീട് ഏപ്രിൽ ഫൂൾസ് ദിനമായി പരിണമിക്കപ്പെട്ടതെന്ന് പറയപ്പെടുന്നു.
അതേസമയം റൊമേനിയയിലെ ഒരു ആഘോഷമായ ഹിലാരിയയുമായി ബന്ധപ്പെട്ടാണ് ഏപ്രിൽ ഫൂൾസ് ദിനത്തിന്റെ തുടക്കമെന്നും ചിലർ വിശ്വസിക്കുന്നു. ലാറ്റിൻ ഭാഷയിൽ സന്തോഷമുള്ളത് എന്നാണ് ഹിലാരിയയുടെ അത്ഥം. ഈ ദിവസം പുരാതന റോമിലെ ജനങ്ങൾ പ്രച്ഛന്നവേഷങ്ങൾ നടത്തി പരസ്പരം തമാശയുണ്ടാക്കിയും വിവിധ കളികൾ കളിച്ചും ആഘോഷിക്കുമായിരുന്നവത്രേ.
ഏപ്രിൽ ഫൂൾസിന്റെ തുടക്കവുമായി ബന്ധപ്പെട്ട് പറഞ്ഞുകേൾക്കുന്ന മറ്റൊരു കാര്യമാണ് വെർണൽ ഇക്വിനോക്സ്. ഉത്തരാർദ്ധ ഗോളത്തിൽ വസന്തകാലം ആരംഭിക്കുന്ന ദിവസമാണ് വെർണൽ ഇക്വിനോക്സ്.
ആളുകളെ രസിപ്പിക്കുന്ന, വേദനിപ്പിക്കാത്ത തമാശകളിലൂടെയും പറ്റിക്കലുകളിലൂടെയും സന്തോഷം പങ്കുവെക്കുക എന്നതാണ് ഏപ്രിൽ ഫൂൾസ് ദിനാഘോഷത്തിന്റെ പ്രത്യേകത. ഏപ്രിൽ ഒന്നാണെന്ന് അറിയാത്ത ആളുകളെയാണ് പറ്റിക്കാൻ എളുപ്പം. അതുകൊണ്ട് ആരോടും നാളെ ഏപ്രിൽ ഒന്നാണെന്ന കാര്യം ഓർമ്മിപ്പിക്കേണ്ട
Discussion about this post