വാഷിംഗ്ടൺ: മുൻ അമേരിക്കൻ പ്രസിഡന്റ് ഡോണാൾഡ് ട്രംപ് അറസ്റ്റിൽ. തിരഞ്ഞെടുപ്പ് ചട്ടം ലംഘിച്ച് വഴിവിട്ട ബന്ധം ഒതുക്കാൻ പോൺ താരത്തിന് പണം നൽകിയെന്ന കേസിലാണ് നടപടി. കോടതി നടപടികൾക്ക് മുന്നോടിയായാണ് അറസ്റ്റ് രേഖപ്പെടുത്തിയത്. ഇതിന് ശേഷം സ്വന്തം ജാമ്യത്തിൽ വിട്ടയക്കും. ക്രിമിനൽ കേസിൽ അറസ്റ്റിലാകുന്ന ആദ്യ മുൻ യുഎസ് പ്രസിഡന്റാണ് ഡോണാൾഡ് ട്രംപ്.
ട്രംപ് അനുകൂലികളുടെ പ്രതിഷേധ സാധ്യത കണക്കിലെടുത്ത് ന്യൂയോർക്ക് സിറ്റിയിലും ട്രംപ് ടവറിന് മുന്നിലും കനത്ത സുരക്ഷ ഏർപ്പെടുത്തിയിട്ടുണ്ട്. ഏകദേശം 36,000 ത്തോളം പോലീസുകാരെയാണ് സുരക്ഷാ ചുമതലകൾക്കായി മാത്രം വിന്യസിച്ചിരിക്കുന്നത്.
2016ലെ തിരഞ്ഞെടുപ്പിനുമുമ്പ് ട്രംപ്, പോൺ താരമായ സ്‌റ്റോാമി ഡാനിയൽസിന് 1,30,000 ഡോളർ നൽകിയെന്ന കേസിലാണ് കുറ്റം ചുമത്തിയത്. ക്രിമിനൽ കുറ്റം ചുമത്തപ്പെടുന്ന ആദ്യ മുൻ യുഎസ് പ്രസിഡന്റാണ് ട്രംപ്. രാഷ്ട്രീയ വൈരം തീർക്കാനായി കെട്ടിച്ചമച്ചതാണ് കേസെന്ന് ട്രംപ് ആരോപിച്ചിരുന്നു.
