‘നാട്ടു നാട്ടു‘ ഗാനത്തിന് കൊറിയയിൽ അരാധകർ ധാരാളമെന്ന് ദക്ഷിണ കൊറിയൻ വിദേശകാര്യ മന്ത്രി; ഇന്ത്യയിൽ വരാൻ കഴിഞ്ഞതിന്റെ സന്തോഷം ഹിന്ദിയിൽ പങ്കുവെച്ച് പാർക്ക് ജിൻ (വീഡിയോ)

ന്യൂഡൽഹി: ഇന്ത്യയുടെ ഓസ്കർ പുരസ്കാര ഗാനം നാട്ടു നാട്ടുവിന് തന്റെ രാജ്യത്ത് ആരാധകർ ഏറെയാണെന്ന് ദക്ഷിണ കൊറിയൻ വിദേശകാര്യ വകുപ്പ് മന്ത്രി പാർക്ക് ജിൻ. ഗാനം മാത്രമല്ല, ആർ ആർ ആർ എന്ന ചിത്രവും അതിഗംഭീരമായിരുന്നുവെന്നും അദ്ദേഹം പറഞ്ഞു. പാർക്ക് ജിന്നിന്റെ പ്രശംസ സവിശേഷപ്പെട്ടതാണെന്നും അതിന് നന്ദി അറിയിക്കുകയാണെന്നും ഇന്ത്യൻ വിദേശകാര്യ വകുപ്പ് മന്ത്രി എസ് ജയ്ശങ്കർ പറഞ്ഞു. ദ്വിദിന ഇന്ത്യൻ സന്ദർശനത്തിന് എത്തിയതാണ് ദക്ഷിണ കൊറിയൻ വിദേശകാര്യ വകുപ്പ് മന്ത്രി.

ഇന്ത്യയിൽ വരാൻ കഴിഞ്ഞതും ഇന്ത്യൻ വിദേശകാര്യ മന്ത്രിയുമായി കൂടിക്കാഴ്ച നടത്താൻ സാധിച്ചതും അങ്ങേയറ്റം സന്തോഷകരമായ അനുഭവമാണ് എന്ന് ഹിന്ദിയിൽ പാർക്ക് ജിൻ പറഞ്ഞു. കൊറിയൻ വിദേശകാര്യ വകുപ്പ് മന്ത്രി ഹിന്ദിയിൽ സംസാരിക്കുന്നതിന്റെ വീഡിയോ സാമൂഹിക മാദ്ധ്യമങ്ങളിൽ വൈറലാണ്.

#WATCH | "Mujhe India aa kar aur aapse mil kar bhut khushi ho rahi hai," says South Korea's Foreign Minister Park Jin in Hindi as he thanks EAM Dr S Jaishankar for the warm welcome pic.twitter.com/VkBskMnywH

— ANI (@ANI) April 7, 2023

അന്താരാഷ്ട്ര തലത്തിൽ തന്ത്രപ്രധാനമായ പങ്കാണ് നിലവിലെ സാഹചര്യത്തിൽ ഇന്ത്യ വഹിക്കുന്നത്. ഇന്ത്യയുടെ ജി20 അദ്ധ്യക്ഷ പദവി ലോകത്തിനാകെ ഗുണകരമാകുമെന്നും അദ്ദേഹം പറഞ്ഞു. വിദേശകാര്യ വക്താവ് അരിന്ദം ബഗ്ചി ഉൾപ്പെടെയുള്ളവർ പാർക്ക് ജിന്നിനെ ഇന്ത്യയിലേക്ക് സ്വാഗതം ചെയ്തു.