എറണാകുളം: ചേരാനല്ലൂരിൽ ട്രാൻസ്‌ഫോമർ മോഷ്ടിച്ച് കടത്താൻ ശ്രമിച്ചയാൾ പിടിയിൽ. കൊൽക്കത്ത സ്വദേശി മുഹമ്മദ് റൂബൽ മൊല്ലയാണ് പടിയിലായത്. വിഷു ദിനത്തിൽ രാവിലെയോടെയായിരുന്നു ഇയാൾ ട്രാൻസ്‌ഫോമർ മോഷ്ടിച്ച് പെട്ടിയോട്ടോയിൽ കടത്താൻ ശ്രമിച്ചത്.
പുലർച്ചെ മൂന്ന് മണിയ്ക്ക് ചേരാനല്ലൂർ ജയകേരള ബസ് സ്റ്റാൻഡിന് സമീപത്തുള്ള ട്രാൻസ്‌ഫോമർ ആണ് മുഹമ്മദ് മോഷ്ടിക്കാൻ ശ്രമിച്ചത്. ഇതുമായി പെട്ടിയോട്ടോയിൽ പോകുന്നതിനിടെ വിഷുക്കണിയുമായി എത്തിയ സംഘത്തിന്റെ മുൻപിൽ പെടുകയായിരുന്നു. തുടർന്ന് പ്രദേശവാസികളും സംഘവും ചേർന്ന് വാഹനം തടഞ്ഞു. ഇതോടെ വണ്ടിയിലുണ്ടായിരുന്ന മറ്റ് രണ്ട് പേർ ഓടി രക്ഷപ്പെടുകയായിരുന്നു.
മോഷണ വിവരം ഉടൻ കെഎസ്ഇബിയെ അറിയിച്ചു. ഉദ്യോഗസ്ഥർ വിവരം അറിയിച്ചത് പ്രകാരം പോലീസ് എത്തി മുഹമ്മദിനെ കസ്റ്റഡിയിൽ എടുത്തു. പെട്ടിയോട്ടോയും ട്രാൻസ്‌ഫോമറും പോലീസ് കസ്റ്റഡിയിൽ എടുത്തിട്ടുണ്ട്. സംഭവത്തിൽ കൂട്ടുപ്രതികളെ പിടികൂടാനുള്ള ശ്രമം ഊർജ്ജിതമായി തുടരുകയാണ്.
മുഹമ്മദ് റൂബൽ മൊല്ല പോലീസ് കസ്റ്റഡിയിലാണ്. ഇവർ കടത്താൻ ശ്രമിച്ച ട്രാൻസ്‌ഫോമറിന് ഏകദേശം ഒരു ലക്ഷം രൂപ വിലവരും. സംഭവത്തിൽ വിശദമായ അന്വേഷണം പുരോഗമിക്കുന്നതായി പോലീസ് വ്യക്തമാക്കിയിട്ടുണ്ട്.
Discussion about this post