രാവിലെ എഴുന്നേറ്റുകഴിഞ്ഞാല് നിര്ത്താതെ നിരവധി തവണ തുമ്മുന്ന പതിവുണ്ടോ, പേടിക്കേണ്ട, നിങ്ങള് ഒറ്റയ്ക്കല്ല. എഴുന്നേറ്റുകഴിഞ്ഞാല് നിര്ത്താതെ തുമ്മുന്നുവെന്ന പരാതി നിരവധിപേര്ക്കുണ്ട്. അതിന് പല കാരണങ്ങളും ഉണ്ട്. മുംബൈയിലെ ഭാട്ടിയ ആശുപത്രിയിലെ ഇഎന്ടി സര്ജനായ ഡോ. അനാമികയും ഗുഡ്ഗാവിലെ സികെ ബിര്ള ആശുപത്രിയിലെ ക്രിട്ടിക്കല് കെയര്, പള്മണോളജി വിഭാഗം മേധാവി ഡോ.കുല്ദീപ് കുമാര് ഗ്രോവറും ഇതിന് നല്കുന്ന വിശദീകരണം നോക്കാം.
മൂക്കിനുള്ളില് അസ്വസ്ഥയുണ്ടാക്കുന്നവയെ പുകച്ച് പുറത്താക്കുന്നതിനുള്ള ശരീരത്തിന്റെ ഏറ്റവും ശക്തമായ പ്രതികരണമാണ് തുമ്മല്. ഉറങ്ങുമ്പോള് പൊടി, വായുവിലെ സൂക്ഷ്മമാലിന്യങ്ങള്, കിടക്കയിലെ ചെറുനാരുകള്, ഫംഗസുകള്, ചെറുപ്രാണികള്, ഗന്ധങ്ങള് തുടങ്ങി അലര്ജിയുണ്ടാക്കുന്ന പലതരത്തിലുള്ള സാധനങ്ങള്ക്ക് നടുവിലാണ് നമ്മള് കിടക്കുന്നത്. ഇതെല്ലാം ശ്വാസോച്ഛാസത്തിലൂടെ നമ്മുടെ മൂക്കിലെത്താന് സാധ്യത കൂടുതലാണ്. ഉറക്കമെഴുന്നേല്ക്കുമ്പോള് ഇവയെ പുറന്തള്ളാനുള്ള ശരീരത്തിന്റെ ശ്രമമാണ് തുമ്മലായി രൂപമെടുക്കുന്നത്. ഇത് ശരീരത്തിന്റെ തികച്ചും സ്വാഭാവികമായ ഒരു പ്രതികരണം മാത്രമാണ്.
തുമ്മുമ്പോള് മൂക്കിനുള്ളിലെ അനാവശ്യവസ്തുക്കള് നീക്കാനാണ് ശരീരം ശ്രമിക്കുന്നത്. ഇത് വളരെ പ്രധാനപ്പെട്ട ഒരു ശരീരിക പ്രക്രിയയാണ്. അലര്ജിക് റിനിറ്റിസ് എന്നാണ് വൈദ്യശാസ്ത്രപരമായി തുമ്മല് അറിയപ്പെടുന്നത്. പെട്ടെന്ന് തുമ്മിയാല് ഓര്ക്കുക, മൂക്കിലോ മൂക്കിന് പിറകിലെ നാസോഫാരിംഗ്സിലോ പൊടിയോ പുകയോ മറ്റെന്തെങ്കിലും അന്യവസ്തുക്കളോ കയറിയിരിക്കുന്നുണ്ടാകും.
ഇതുകൂടാതെ, താപനിലയില് മാറ്റമുണ്ടായാലും തുമ്മലുണ്ടാകും. ഉറങ്ങുമ്പോള് ആവശ്യത്തിന് ചൂടുള്ള, നല്ല അന്തരീക്ഷത്തിലാകും നമ്മള് കിടക്കുക. എന്നാല് എഴുന്നേല്ക്കുമ്പോള് താപനില കുറയാനും തണുപ്പുണ്ടാകാനും സാധ്യതയുണ്ട്. ഉത് തുമ്മലിന് കാരണമാകും. ഇനി എയര്കണ്ടീഷന് ചെയ്ത മുറികളിലാണ് ഉറങ്ങുന്നതെങ്കില് വരണ്ട വായു ആയിരിക്കും അവിടെയുണ്ടാകുക. ഇതും തുമ്മലിന് കാരണമാകും. സൈനസൈറ്റിസോ മൂക്കുമായി ബന്ധപ്പെട്ട മറ്റെന്തെങ്കിലും പ്രശ്നങ്ങള് ഉള്ളവര്ക്കോ ആയിരിക്കും ഇത്തരം പ്രശ്നങ്ങള് കൂടുതലായി അനുഭവപ്പെടുക.
പ്രകാശമേല്ക്കുന്നത് ചിലരില് തുമ്മലിന് കാരണമാകാറുണ്ട്. ഫോട്ടിക് സ്നീസ് റിഫ്ളെക്സ് എന്നാണ് ഇതറിയപ്പെടുന്നത്. തീവ്രമായ വെളിച്ചം, സൂര്യപ്രകാശം എന്നിവയേറ്റാല് തുമ്മല് ഉണ്ടാകുന്ന പ്രശ്നമാണിത്. ഇത് നിയന്ത്രിക്കുക വളരെ പ്രയാസകരമാണ്.
രാവിലെ എഴുന്നേല്ക്കുമ്പോഴുള്ള തുമ്മലില് നിന്ന് എങ്ങനെ രക്ഷ നേടാം?
കിടക്കയും തലയിണയും കിടക്കവിരിയും തലയിണക്കവറുമെല്ലാം പൊടിയൊന്നുമില്ലാതെ വൃത്തിയുള്ളവയാണെന്ന് ഉറപ്പുവരുത്തുക. തണുപ്പുള്ള സ്ഥലങ്ങളിലാണ് താമസിക്കുന്നതെങ്കില് രാവിലെ എഴുന്നേല്ക്കുമ്പോള് ചൂടുള്ള അന്തരീക്ഷത്തില് നിന്ന് പെട്ടെന്ന് തണുപ്പിലേക്ക് പോകാതിരിക്കുക.
Discussion about this post