കൊച്ചി : പ്രധാനമന്ത്രി ഉദ്ഘാടനം ചെയ്ത് കന്നി യാത്ര നടത്തിയ വന്ദേ ഭാരത് എക്സ്പ്രസിനെ നേരിട്ടെത്തി സ്വീകരിച്ച സിപിഎം കണ്ണൂർ ജില്ലാ സെക്രട്ടറി എംവി ജയരാജനെ സംഘിയാക്കരുതേ എന്ന് സൈബർ സഖാക്കളോട് അപേക്ഷിച്ച് നടൻ ഹരീഷ് പേരടി. ഫേസ്ബുക്കിലൂടെയാണ് അദ്ദേഹത്തിന്റെ പ്രതികരണം. വികസനത്തിന് രാഷ്ട്രിയമില്ല എന്ന് പറഞ്ഞ എംവി ജയരാജന് എവിടെ വെച്ച് കണ്ടാലും താൻ അനുവാദമില്ലാത്തെ ഉമ്മ കൊടുക്കുമെന്നും ഹരീഷ് പേരടി പറഞ്ഞു.
”വികസനത്തിന് രാഷ്ട്രിയമില്ല…എം.വി.ജയരാജൻ…ജയരാജേട്ടാ നിങ്ങൾക്കും നിറയെ ഉമ്മകൾ…എവിടെ വെച്ചെങ്കിലും കണ്ടാൽ അനുവാദമില്ലാതെ തന്നെ ഉമ്മ തരും…പ്രിയപ്പെട്ട സൈബർ സഖാക്കളെ..മൂപ്പരെ സംഘിയാക്കരുതെ …ലാൽ സലാം …” ഹരീഷ് പേരടി കുറിച്ചു.
കണ്ണൂരിലെത്തിയ വന്ദേ ഭാരത് എക്സ്പ്രസിനെ എംവി ജയരാജനും മറ്റു നേതാക്കളും നേരിട്ടെത്തി സ്വീകരിച്ചിരുന്നു. ലോക്കോ പൈലറ്റിനെ എംവി ജയരാജൻ പൊന്നാട അണിയിച്ചാണ് സ്വീകരിച്ചത്. എംഎൽഎമാരായ കെവി സുമേഷും കടന്നപ്പള്ളി രമചന്ദ്രനും സ്വീകരിക്കാനെത്തി. അഞ്ച് മിനിറ്റോളം കണ്ണൂർ റെയിൽവേ സ്റ്റേഷനിൽ നിർത്തിയിട്ട ട്രെയിനിൽ കയറിയ നേതാക്കൾ കോച്ചുകളിലൂടെ നടന്നാണ് പുറത്തിറങ്ങിയത്.
