ബംഗളൂരു: ഏകീകൃത സിവിൽ കോഡും, സൗജന്യ പാചകവാതകവുമുൾപ്പെടെ ജനക്ഷേമ പ്രഖ്യാപനങ്ങളുമായി കർണാടക ബിജെപിയുടെ തിരഞ്ഞെടുപ്പ് പ്രകടന പത്രിക. യുവജനക്ഷേമം, അടിസ്ഥാന സൗകര്യം എന്നിവയ്ക്കാണ് ബിജെപി ഇക്കുറി ഊന്നൽ നൽകിയിരിക്കുന്നത്. എല്ലാവർക്കുമൊപ്പം, എല്ലാവരുടെയും വികസനമെന്ന പ്രധാനമന്ത്രിയുടെ കാഴ്ചപ്പാട് പൂർത്തീകരിക്കുന്ന പ്രഖ്യാപനങ്ങളാണ് പ്രകനപത്രികയിൽ ഉള്ളത്.
ബിജെപി അധികാരത്തിലേറിയാൽ എല്ലാവർക്കും തുല്യ നീതി ഉറപ്പാക്കാനായി ഏകീകൃത സിവിൽ കോഡ് നടപ്പിലാക്കുമെന്ന് പ്രകടനപത്രികയിൽ വ്യക്തമാക്കുന്നു. പാവപ്പെട്ട കുടുംബങ്ങൾക്ക് അര ലിറ്റർ നന്ദിനി പാൽ സൗജന്യമായി നൽകും. പ്രതിവർഷം മൂന്ന് പാചകവാതക സിലിണ്ടർ സർക്കാർ സൗജന്യമായി നൽകും. പോഷകാഹാരക്കുറവ് പരിഹരിക്കുന്നതിനായി എല്ലാ വാർഡുകളിലും അടൽ ആഹാർ കേന്ദ്രങ്ങൾ സ്ഥാപിക്കും. ഇതുവഴി പാവപ്പെട്ട കുടുംബങ്ങൾക്ക് മികച്ച ഭക്ഷണം ലഭിക്കുന്നതാണ്.
സർക്കാർ സ്‌കൂളുകൾ കൂടുതൽ മികച്ചതാക്കാൻ വിശ്വേശര വിദ്യ യോജനയ്ക്ക് തുടക്കമിടും. മികച്ച തൊഴിൽ- വിദ്യാഭ്യാസ അന്തരീക്ഷത്തിനായി സാമാന്യ പദ്ധതിയ്ക്ക് തുടക്കം കുറിയ്ക്കും. ഐഎഎസ് ഉൾപ്പെടെയുളള ഉന്നതപഠനം പൂർത്തീകരിക്കുന്നതിനായി ഉദ്യോഗാർത്ഥികൾക്ക് സാമ്പത്തിക സഹായം നൽകുമെന്നും പ്രകടന പത്രികയിൽ വ്യക്തമാക്കുന്നു.
പൊതുജനാരോഗ്യമേഖല കൂടുതൽ ശക്തിപ്പെടുത്തുക ലക്ഷ്യമിട്ടുള്ള പ്രവർത്തനങ്ങൾക്ക് തുടക്കം കുറിക്കും. ബംഗളൂരു നഗരത്തിൽ കൂടുതൽ വികസന പ്രവർത്തനങ്ങൾക്ക് തുടക്കം കുറിയ്ക്കും. ആഗോളതലത്തിൽ ബംഗളൂരുവിനെ ഡിജിറ്റൽ ഹബ്ബാക്കുകയാണ് ബിജെപിയുടെ ലക്ഷ്യം. ഇതിനായുള്ള പ്രവർത്തനങ്ങൾ നടപ്പിലാക്കും.
കർഷകർക്ക് സഹായമായി 30,000 കോടി രൂപ നൽകും. കാവേരി സർക്യൂട്ട് ഉൾപ്പെടെയുള്ള തീർത്ഥാടന കേന്ദ്രങ്ങളുടെ വികസനത്തിനായി 1,500 കോടി രൂപയുടെ നവീകരണ പ്രവർത്തനങ്ങൾ നടത്തും. പാവപ്പെട്ട 10 ലക്ഷം കുടുംബങ്ങൾക്ക് സർവരിഗു സുരു യോജനയിൽ വീട് വയ്ക്കാനുള്ള സ്ഥലം നൽകുമെന്നും പ്രകടന പത്രികയിലുണ്ട്.
ബംഗളൂരുവിൽ നടന്ന പരിപാടിയിൽ ബിജെപി ദേശീയ അദ്ധ്യക്ഷൻ ജെ.പി നദ്ദയാണ് പ്രകടന പത്രിക പുറത്തിറക്കിയത്. മുഖ്യമന്ത്രി ബസവരാജ് ബൊമ്മെ, മുൻ മുഖ്യമന്ത്രിയും മുതിർന്ന നേതാവുമായ ബസവരാജ് ബൊമ്മെ മറ്റ് നേതാക്കൾ പ്രവർത്തകർ എന്നിവരും പരിപാടിയിൽ പങ്കെടുത്തിരുന്നു.
