കൊച്ചി : നെടുമ്പാശ്ശേരി വിമാനത്താവളത്തിൽ വൻ സ്വർണവേട്ട. വിദേശത്ത് നിന്നെത്തിയ രണ്ട് യാത്രക്കാരിൽ നിന്നായി 1.40 കോടിയുടെ സ്വർണം പിടികൂടി. പാലക്കാട്, മലപ്പുറം സ്വദേശികളാണ് പിടിയിലായത്. ക്യാപ്‌സ്യൂൾ രൂപത്തിലാക്കി മലദ്വാരത്തിൽ ഒളിപ്പിച്ച് സ്വർണം കടത്താനാണ് ശ്രമിച്ചത്.
മലേഷ്യയിൽ നിന്നും ദുബായിൽ നിന്നുമെത്തിയ യാത്രക്കാരിൽ നിന്നാണ് സ്വർണം പിടികൂടിയത്. പാലക്കാട് സ്വദേശി മുഹമ്മദ് ഷമീറിൽ നിന്ന് 84 ലക്ഷത്തോളം രൂപ വില വരുന്ന 1784 ഗ്രാം സ്വർണം പിടിച്ചെടുത്തു. സ്വർണം നാലു കാപ്‌സ്യൂളുകളാക്കി ശരീരത്തിനുള്ളിൽ ഒളിപ്പിച്ച് കടത്താനായിരുന്നു ശ്രമം. പേസ്റ്റ് രൂപത്തിലാക്കി സ്വർണം ജീൻസിനുള്ളിൽ ഒളിപ്പിച്ചിരുന്നു.
മലപ്പുറം സ്വദേശി ഷെരീഫിൽ നിന്ന് 1254 ഗ്രാം സ്വർണം പിടികൂടി. നാല് കാപ്‌സ്യൂളുകളാക്കി മലദ്വാരത്തിലാക്കിയാണ് ഒളിപ്പിച്ചിരുന്നത്. രണ്ടു പേരിൽ നിന്നുമായിട്ടാണ് 1.40 കോടിയുടെ സ്വർണം പിടിച്ചെടുത്തത്.
Discussion about this post