കൊച്ചി: മലയാള സിനിമയിലെ താരങ്ങളുടെ ലഹരി ഉപയോഗവുമായി ബന്ധപ്പെട്ട് ഗുരുതര ആരോപണവുമായി താര സംഘടനയായ’ അമ്മ’ എക്സിക്യൂട്ടീവ് അംഗം ബാബുരാജ്. ലഹരി ഇടപാടുകാരിൽ നിന്ന് താരങ്ങളുടെ പേരുകൾ പോലീസിന് ലഭിക്കുന്നതെന്നും ലഹരി ഉപയോഗിക്കുന്ന മുഴുവൻ നടന്മാരുടെയും ലിസ്റ്റ് പോലീസിന്റെയും അമ്മയുടെയും കൈകളിലുണ്ടെന്നും നടൻ വ്യക്തമാക്കി.
പിടിയിലാകുന്ന ലഹരി ഇടപാടുകാരിൽനിന്നാണ് സിനിമയിലെ ലഹരി ഉപയോഗക്കാരെക്കുറിച്ച് എക്സൈസിന് വിവരം ലഭിക്കുന്നത്. ഒരിക്കൽ ഒരു പ്രതിയുടെ മൊഴിയുടെ അടിസ്ഥാനത്തിൽ എക്സൈസ് ഉദ്യോഗസ്ഥൻ പിൻതുടർന്നെത്തിയത് ഒരു വലിയ നടന്റെ വാഹനത്തെയാണ്. അന്ന് വാഹനം പരിശോധിച്ചിരുന്നെങ്കിൽ മലയാള സിനിമ പിന്നെ ഉണ്ടാകുമായിരുന്നില്ലെന്നും, അതൊക്കെ നഗ്നമായ സത്യങ്ങളാണെന്നും ബാബുരാജ് പറഞ്ഞു.പലരും തലനാരിഴയ്ക്കാണ് രക്ഷപ്പെട്ടിട്ടുള്ളതെന്നും ലിസ്റ്റ് കൃത്യമായി അമ്മയ്ക്ക് കിട്ടാറുണ്ടെന്നും ബാബുരാജ് പറയുന്നു.
പണ്ടൊക്കെ മയക്കുമരുന്ന് ഉപയോഗിക്കുന്നതിന് ഒരു മറയുണ്ടായിരുന്നു. ഇപ്പോൾ ആ മറവ് മാറി പരസ്യമായി ചെയ്യാൻ തുടങ്ങി. ഈ രീതി മാറണമെന്നും ബാബുരാജ് പറയുന്നു. ലൊക്കേഷനിൽ ജോലിക്കിടെ ഇതൊക്കെ ഉപയോഗിക്കുന്നതാണ് പ്രശ്നം. ജോലി കഴിഞ്ഞ് വീട്ടിൽ പോയി ഇഷ്ടമുള്ളത് ചെയ്യൂവെന്നും ബാബുരാജ് പറഞ്ഞു.
Discussion about this post