റിയാദ് : സൗദി അറേബ്യയിലെ റിയാദിൽ നടന്ന തീപിടുത്തത്തിൽ മരിച്ച രണ്ട് മലയാളികളെ തിരിച്ചറിഞ്ഞു. . മലപ്പുറം കുറ്റിപ്പുറം പഞ്ചായത്തിലെ വളാഞ്ചേരി പൈങ്കണ്ണൂർ തറക്കൽ യൂസഫിന്റെ മകൻ അബ്ദുൽ ഹക്കീം (31), മേൽമുറി സ്വദേശി നൂറേങ്ങൽ കവുങ്ങൽത്തൊടി വീട്ടിൽ ഇർഫാൻ ഹബീബ് (33) എന്നിവരാണ് മരിച്ച മലയാളികൾ. രണ്ട് മലയാളികൾ കൂടാതെ രണ്ട് തമിഴ്‍നാട് സ്വദേശികളും ഗുജറാത്ത്, മഹാരാഷ്‍ട്ര എന്നിവിടങ്ങളിൽ നിന്നുള്ളവരും മരിച്ചതായാണ് റിപ്പോർട്ട്.
വെള്ളിയാഴ്ച പുലർച്ചെ 1.30 നാണ് ഖാലിദിയ്യയിൽ പെട്രോൾ പമ്പിലെ താമസസ്ഥലത്ത് തീപിടുത്തം ഉണ്ടായത്. പെട്രോൾ പമ്പിൽ പുതുതായി ജോലിക്ക് എത്തിയവരാണ് അപകടത്തിൽ പെട്ടത്.
ഷോർട്ട് സർക്യൂട്ട് ആണ് അപകട കാരണമെന്നാണ് പ്രാഥമിക റിപ്പോർട്ട്. മൃതദേഹങ്ങൾ ശുമൈസി ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. മറ്റുള്ളവരേക്കുറിച്ചുള്ള വിവരങ്ങൾ ലഭ്യമായിട്ടില്ല. ഇന്ത്യൻ എംബസി ഉദ്യോഗസ്ഥർ നടപടികൾ സ്വീകരിച്ചുവരികയാണ്.
