മലപ്പുറം: കക്കാട്ട് നഗരമദ്ധ്യത്തിൽ വൻ തീപിടിത്തം. വ്യാപാര സ്ഥാപനങ്ങൾ പ്രവർത്തിക്കുന്ന കെട്ടിടം പൂർണമായും കത്തിനശിച്ചു. ഇന്ന് പുലർച്ചെ 5.45 ഓടെയായിരുന്നു സംഭവം. അഗ്നിശമന സേനയെത്തി കെട്ടിടത്തിലെ തീ നിയന്ത്രണ വിധേയമാക്കി.
കെട്ടിടത്തിലെ ഓട്ടോ സ്പെയർ പാർട്സ് കടയിലാണ് ആദ്യം തീപിടിത്തം ഉണ്ടായത്. പിന്നീട് മറ്റ് ഭാഗങ്ങളിലേക്ക് വ്യാപിക്കുകയായിരുന്നു. എഞ്ചിൻ ഓയിൽ ഉൾപ്പെടെ കടയിൽ ഉണ്ടായിരുന്നത് തീ ആളിപ്പടരാൻ കാരണമായി. അതുവഴി പോയ യാത്രികരാണ് സംഭവം ആദ്യം കണ്ടത്. ഉടനെ വിവരം അഗ്നിശമന സേനയെ അറിയിക്കുകയായിരുന്നു.
സംഭവ സമയം കെട്ടിടത്തിലോ പരിസരത്തോ ആരും ഉണ്ടായിരുന്നില്ല. അതിനാൽ വൻ ദുരന്തമാണ് ഒഴിവായത്. അഞ്ച് യൂണിറ്റ് ഫയർഫോഴ്സ് എത്തിയാണ് തീ നിയന്ത്രണ വിധേയമായത്. ലക്ഷക്കണക്കിന് രൂപയുടെ നാശനഷ്ടമാണ് ഉണ്ടായത് എന്നാണ് സൂചന. സംഭവത്തിൽ അന്വേഷണം ആരംഭിച്ചിട്ടുണ്ട്. ഷോർട്ട് സർക്യൂട്ട് ആണ് തീപിടിത്തത്തിന് കാരണം എന്നാണ് നിഗമനം.
Discussion about this post