ഹൈന്ദവാചാരപ്രകാരം പ്രിയപ്പെട്ടവരുടെ മരണശേഷവും പരേതാത്മാവിനായുള്ള ബലി കർമങ്ങൾ ഓരോ വർഷവും മുടക്കമില്ലാതെ അനുഷ്ഠിച്ചുവരണം എന്നാണ് പറയുന്നത്. എന്നാൽ തിരക്കുപിടിച്ച ജീവിതത്തിനിടക്ക് അതിനുള്ള അവസരം പലർക്കും ലഭിക്കാറില്ല. പിതൃശാന്തി വരുത്തിയില്ല എങ്കില്‍ കുടുംബത്തില്‍ അനര്‍ത്ഥങ്ങള്‍ ഉണ്ടാവാം എന്നാണ് വിശ്വാസം. സന്താനങ്ങൾക്ക് ദോഷം, മാനസിക പ്രശ്നങ്ങൾ എന്നിവയൊക്കെ ഇതിന്റെ അനന്തരഫലങ്ങളായി കണക്കാക്കപ്പെടുന്നു.
പലപ്പോഴും പിതൃക്കൾക്ക് ആത്മശാന്തി ഉണ്ടായിട്ടില്ല എന്ന് മനസിലാകുന്നത് ജ്യോതിഷപ്രശ്നത്തിനിടക്ക് ആയിരിക്കും. മരണത്തോടു കൂടി ദേഹം മാത്രമേ നശിക്കുകയുള്ളൂ. ആത്മാവ് നശിക്കുന്നില്ല. എന്നാല്‍, ആത്മാവിന് സായൂജ്യം ലഭിക്കണമെങ്കില്‍ മോക്ഷപ്രാപ്തി ലഭിക്കണം. മോക്ഷപ്രാപ്തി ലഭിക്കും വരെ ആത്മാവ് അലയുമെന്നാണ് വിശ്വാസം.ഈ അവസ്ഥയിൽ പ്രിയപ്പെട്ടവരുടെ ആത്മ ശാന്തിക്കായി ചെയ്യാൻ കഴിയുന്ന ഒന്നാണ് തിലഹോമം.
തിലഹോമം ഒരു പരിഹാര കർമമാണ്. വിധിപ്രകാരമുള്ള മരണാനന്തര കര്‍മ്മങ്ങള്‍ നടത്താതിരിക്കുമ്പോഴാണ് ആത്മാവിന് മോക്ഷം ലഭിക്കാതിരിക്കുന്ന അവസ്ഥ ഉണ്ടാവുക. മാത്രമല്ല, സഞ്ചയനം, സപിണ്ഡി തുടങ്ങിയ അടിയന്തിരങ്ങള്‍ നടത്തുമ്പോള്‍ പറ്റുന്ന പിഴവുകള്‍ പോലും ആത്മാവിന് മോക്ഷം ലഭിക്കാത്ത അവസ്ഥയുണ്ടാക്കാം. ജ്യോതിഷപ്രശ്നത്തിൽ ഇത്തരമൊരു അവസ്ഥ തെളിയുകയാണ് എങ്കിൽ അതിനുള്ള പരിഹാരമാണ് തിലഹോമം.
മോക്ഷത്തിനും പിതൃക്കളുടെ പ്രീതിക്കുമായി നടത്തുന്ന ഈ ഹോമത്തിലെ മുഖ്യദ്രവ്യം എള്ളാണ്. പ്ലാശിന്‍ചമത, നെയ്യ്, ഹവിസ്സ്, തിലപായസം എന്നിവയും ഹോമദ്രവ്യങ്ങളായി ഉപയോഗിക്കുന്നു. തിലഹോമം രാത്രിയില്‍ നടത്താറില്ല. തിലഹോമം നടത്തി പിതൃശുദ്ധിയും പൂര്‍ത്തിയാക്കുന്നതോടെ പ്രേതാത്മാവ് സായൂജ്യപൂജയ്ക്ക് അര്‍ഹമാകുന്നു. തിലഹോമശുദ്ധി വരുത്തിയ ആത്മാക്കളെ വിഷ്ണുവില്‍ ലയിപ്പിക്കുന്ന ക്രിയയാണ് സായൂജ്യപൂജ. ഇതിനായി വിഷ്ണു പ്രതിമയുണ്ടാക്കി പൂജ ചെയ്യുന്നു.
രാമേശ്വരം, തിരുവല്ലം, തിരുനാവായ, തിരുനെല്ലി, വര്‍ക്കല, കാശി തുടങ്ങി പിതൃക്രിയകള്‍ക്ക് പേരുകേട്ട ക്ഷേത്രങ്ങളില്‍ ഒരിക്കലെങ്കിലും ബലിയിട്ട്, തിലഹോമം നടത്തുന്നത് നല്ലതാണ് . കുടുംബപരമായ അശാന്തികൾ ഇതോടെ പരിഹരിക്കപ്പെടും സംതൃപ്ത ജീവിതം ലഭിക്കുകയും ചെയ്യുന്നു എന്നാണ് വിശ്വാസം.
Discussion about this post