സാൻഫ്രാൻസിസ്കോ : ട്വിറ്ററിന്റെ പുതിയോ സിഇഒ ആകാൻ ലിന്റ യക്കാറിനോ. സിഇഒ സ്ഥാനത്ത് നിന്ന് ശതകോടീശ്വരനായ ഇലോൺ മസ്ക് പിന്മാറുന്നതിന് തുടർന്നാണ് തീരുമാനം. ആറാഴ്ചയ്ക്കുള്ളിൽ ലിൻഡ സിഇഒ ചുമതലയേൽക്കുമെന്നും മസ്ക് അറിയിച്ചു.
എൻബിസി യൂണിവേർസൽ എക്സിക്യൂട്ടീവ് ആണ് ലിന്റ. ‘ലിൻഡ യക്കാറനോയെ ട്വിറ്ററിന്റെ പുതിയ സിഇഒ ആയി സ്വാഗതം ചെയ്യുന്നതിന്റെ ആവേശത്തിലാണ്. ലിൻഡ പ്രധാനമായും ബിസിനസ് പ്രവർത്തനങ്ങളിൽ ശ്രദ്ധ കേന്ദ്രീകരിക്കും. ഞാൻ പുതിയ സാങ്കേതികവിദ്യയിലാകും ശ്രദ്ധ കേന്ദ്രീകരിക്കുക. ഈ പ്ലാറ്റ്ഫോം കൂടുതൽ മികച്ചതാക്കി മാറ്റുന്നതിന് ലിൻഡയ്ക്കൊപ്പം പ്രവർത്തിക്കാൻ ആഗ്രഹിക്കുന്നു,’ അദ്ദേഹം ട്വീറ്റിൽ കുറിച്ചു.
വർഷാവസാനം ട്വിറ്ററിന് പുതിയ സിഇഒയെ ലഭിക്കുമെന്നും താൻ സ്ഥാനമൊഴിയുമെന്നും മസ്ക് നേരത്തെ പറഞ്ഞിരുന്നു. പുതിയ ട്വിറ്റർ സിഇഒയെ താൻ നിയമിച്ചിട്ടുണ്ടെന്നും ഏതാനും ആഴ്ചകൾക്കുള്ളിൽ അവർ സ്ഥാപനത്തിൽ ചേരുമെന്നും ട്വിറ്റർ മേധാവി വ്യാഴാഴ്ച വെളിപ്പെടുത്തി. ഇനിമുതൽ താൻ എക്സിക്യൂട്ടീവ് ചെയർ, സിടിഒ എന്ന പദവിയിൽ തുടരുമെന്നും മസ്ക് ട്വിറ്ററിലൂടെ അറിയിച്ചു.
ട്വിറ്ററിന്റെ ആദ്യ വനിതാ സിഇഒ ആണ് ലിൻഡ. ടെക് ഇതര മേഖലയിൽ നിന്ന് വരുന്ന ആദ്യത്തെ വ്യക്തി കൂടിയാണ് എന്നത് ശ്രദ്ധേയമാണ്. ട്വിറ്ററിന്റെ മുൻ സിഇഒമാരെല്ലാം ടെക്ക് മേഖലയിൽ നിന്നുള്ളവരായിരുന്നു.
