ഇസ്ലാമാബാദ്; പുതിയ ഹിറ്റ് ലിസ്റ്റ് പുറത്ത് വിട്ട് ഭീകരസംഘടനയായ പാക് താലിബാൻ. പാകിസ്താന്റെ ആഭ്യന്തരമന്ത്രി റാണാ സനാഉല്ലയും മുതിർന്ന സൈനിക ഉദ്യോഗസ്ഥരുമാണ് ലിസ്റ്റിലെ പ്രധാനികൾ. ഇവരോടൊപ്പം രാജ്യത്തെ മുതിർന്ന രാഷ്ട്രീയ പ്രവർത്തകരും ഹിറ്റ് ലിസ്റ്റിൽ ഇടം പിടിച്ചിട്ടുണ്ട്.
തെഹ്രീകെ താലിബാൻ പാകിസ്താനും (ടിടിപി അഥവാ പാക് താലിബാൻ) അതിൻറെ അനുബന്ധ സംഘടനയായ ജമാഅത്തുൽ അഹ്റാറും (ജുഎ) തയ്യാറാക്കിയ പുതിയ പട്ടികയിൽ മറ്റ് നിരവധി മുതിർന്ന സർക്കാർ ഉദ്യോഗസ്ഥരും ഉൾപ്പെടുന്നു, പാകിസ്താനിലെ മുതർന്ന രാഷ്ട്രീയ നേതാക്കളായ ആഭ്യന്തര മന്ത്രി റാണാ സനാഉല്ല, പിഎംഎൽ-എൻ പാർട്ടി വൈസ് പ്രസിഡൻറ് മറിയം നവാസ്, ഉന്നത സൈനിക, രഹസ്യാന്വേഷണ ഉദ്യോഗസ്ഥർ എന്നിവർ പുതിയ ഹിറ്റ് ലിസ്റ്റിൽ ഉൾപ്പെട്ടതായി പ്രാദേശികമാദ്ധ്യമങ്ങൾ റിപ്പോർട്ട് ചെയ്തു.
ഇസ്ലാമി തലവൻ സിറാുജു ഹഖിനെതിരെ വധശ്രമമുണ്ടായി ദിവസങ്ങൾക്ക് ശേഷമാണ് ഹിറ്റ് ലിസ്റ്റ് പുറത്ത് വന്നത്. ഇതിന് പുറമേ, രാജ്യത്തെ സായുധ സേനയ്ക്കും നിയമ നിർവ്വഹണ ഏജൻസികളുടെ ചെക്ക് പോസ്റ്റുകൾക്കും നേരെയുള്ള ആക്രമണ പരമ്പരകളും ടിടിപി ആസൂത്രണം ചെയ്യുന്നതായും റിപ്പോർട്ടുകളുണ്ട്.
അടുത്തിടെ, മെയ് 9 ന് പാകിസ്താൻ പ്രവിശ്യയിൽ ഉടനീളം നടന്ന കലാപത്തെ ടിടിപിയുടെ ചീഫ് കമാൻഡർ സർബക്ഫ് മുഹമ്മദ് പ്രശംസിച്ചിരുന്നു. പാക് മുൻ പ്രധാനമന്ത്രി ഇമ്രാൻ ഖാന്റെ അറസ്റ്റിനെ തുടർന്നാണ് ഈ കലാപങ്ങൾ അരങ്ങേറിയത്. പാർട്ടിയുടെ പേര് നേരിട്ട് പറയാതെ ഗുണ്ടായിസത്തിലും അട്ടിമറിയിലും ഉൾപ്പെട്ട പിടിഐ പ്രവർത്തകർക്ക് ഇയാൾ പിന്തുണ പ്രഖ്യാപിച്ചിരുന്നു.
Discussion about this post