പാർലമെന്റ് മന്ദിര ഉദ്ഘാടന ചടങ്ങിൽ ഏതെല്ലാം പാർട്ടികൾ പങ്കെടുത്തു; ആരെല്ലാം വിട്ടുനിന്നു; വിശദവിവരങ്ങൾ അറിയാം

ന്യൂഡൽഹി : പുതുതായി പണി കഴിപ്പിച്ച പാർലമെന്റ് മന്ദിരം പ്രധാനമന്ത്രി നരേന്ദ്ര മോദി രാജ്യത്തിന് സമർപ്പിച്ചിരിക്കുകയാണ്. വിശിഷ്ടമായ പൂജകൾക്ക് ശേഷമാണ് ഉദ്ഘാടന ചടങ്ങുകൾ നടക്കുന്നത്. പരിപാടിയിൽ 25 പാർട്ടികൾ പങ്കെടുത്തു. കോൺ​ഗ്രസ് ഉൾപ്പെടെയുള്ള 19 പാർട്ടികൾ പരിപാടിയിൽ നിന്ന് വിട്ടുനിൽക്കുകയാണ്.

ബിജു ജനതാദൾ (ബിജെഡി), ലോക് ജനശക്തി പാർട്ടി (രാം വിലാസ്), ബഹുജൻ സമാജ് പാർട്ടി (ബിഎസ്പി), ശിരോമണി അകാലിദൾ (എസ്എഡി), ജനതാദൾ (സെക്കുലർ), തെലുങ്കുദേശം പാർട്ടി (ടിഡിപി), വൈഎസ്ആർ കോൺഗ്രസ് പാർട്ടി എന്നീ പാർട്ടികളാണ് ഉദ്ഘാടന ചടങ്ങിൽ പങ്കെടുക്കുന്നത്.

കോൺ​ഗ്രസും എഐഎംഐഎമ്മും കൂടാതെ ദ്രാവിഡ മുന്നേറ്റ കഴകം (ഡിഎംകെ), ആം ആദ്മി പാർട്ടി (എഎപി), ശിവസേന (യുബിടി), സമാജ്വാദി പാർട്ടി (എസ്പി), കമ്യൂണിസ്റ്റ് പാർട്ടി ഓഫ് ഇന്ത്യ (സിപിഐ), കമ്യൂണിസ്റ്റ് പാർട്ടി ഓഫ് ഇന്ത്യ (മാർക്സിസ്റ്റ്), ജാർഖണ്ഡ് മുക്തി മോർച്ച (ജെഎംഎം), കേരളം കോൺഗ്രസ് (മാണി), വിടുതലൈ ചിരുതൈഗൽ കച്ചി (വിസികെ), രാഷ്ട്രീയ ലോക്ദൾ (ആർഎൽഡി), രാഷ്ട്രീയ ജനതാദൾ (ആർജെഡി), തൃണമൂൽ കോൺഗ്രസ് (ടിഎംസി), ജനതാദൾ (യുണൈറ്റഡ്), നാഷണലിസ്റ്റ് കോൺഗ്രസ് പാർട്ടി (എൻസിപി), ഇന്ത്യൻ യൂണിയൻ മുസ്ലീം ലീഗ് (ഐയുഎംഎൽ), നാഷണൽ കോൺഫറൻസ് (എൻസി), റവല്യൂഷണറി സോഷ്യലിസ്റ്റ് പാർട്ടി (ആർഎസ്പി), ഭാരത് രാഷ്ട്ര സമിതി (‍ബിആർഎസ്), മറുമലർച്ചി ദ്രാവിഡ മുന്നേറ്റ കഴകം (എംഡിഎംകെ) എന്നീ പാർട്ടികൾ പരിപാടിയിൽ നിന്ന് വിട്ടുനിന്നു.

539 ലോക്സഭാ അം​ഗങ്ങളിൽ 382 പേർ ചടങ്ങിന് സാക്ഷ്യം വഹിക്കുന്നുണ്ട്. 238 രാജ്യസഭാം​ഗങ്ങളിൽ നിന്ന് 131 പേർ പങ്കെടുക്കുന്നുണ്ട്. ഇതിൽ രഞ്ജൻ ഗൊഗോയ് ( മുൻ ചീഫ് ജസ്റ്റിസ്), പി ടി ഉഷ (റിട്ടയേർഡ് അത്‌ലറ്റ്), ഇളയരാജ (സംഗീതജ്ഞൻ), ധർമ്മസ്ഥല വീരേന്ദ്ര ഹെഗ്ഗഡെ (ജീവകാരുണ്യ പ്രവർത്തകൻ), വി വിജയേന്ദ്ര പ്രസാദ് (സംവിധായകൻ) എന്നിവരും ഉൾപ്പെടുന്നു.