ഇടുക്കി: തേനി, മേഘമല വന്യജീവി സങ്കേതത്തിൽ വിനോദസഞ്ചാരത്തിന് ഏർപ്പെടുത്തിയ വിലക്ക് പിൻവലിച്ച് അധികൃതർ. അരിക്കൊമ്പന്റെ ഭീതി ഒഴിഞ്ഞ സാഹചര്യത്തിലാണ് നിരോധനം പിൻവലിച്ചത്. ഇതുമായി ബന്ധപ്പെട്ട് തമിഴ്‌നാട് വനംവകുപ്പ് ഉത്തരവ് പുറത്തിറക്കി.
കഴിഞ്ഞ മാസമാണ് ഇവിടങ്ങളിൽ വിനോദ സഞ്ചാരികൾ എത്തുന്നതിന് വിലക്കേർപ്പെടുത്തിയത്. പെരിയാർ കടുവാ സങ്കേതത്തിൽ കൊണ്ടുവിട്ട അരിക്കൊമ്പൻ മേഘമലയിലെ ജനവാസ മേഖലയിൽ ഇറങ്ങുകയും വലിയ ഭീതിയുണ്ടാക്കുകയും ചെയ്തിരുന്നു. ഈ സാഹചര്യത്തിലാണ് വിനോദ സഞ്ചാരത്തിന് വിലക്കേർപ്പെടുത്തിയിരുന്നത്. കഴിഞ്ഞ ദിവസം കമ്പത്ത് നിന്നും അരിക്കൊമ്പനെ പിടികൂടി കളക്കാട് മുണ്ടൻതുറൈ കടുവ സങ്കേതത്തിലേക്ക് മാറ്റിയിരുന്നു.
കടുവാ സങ്കേതത്തിലുള്ള അരിക്കൊമ്പൻ ശാന്തനായി കഴിയുന്നുണ്ടെന്നാണ് വിവരം. കഴിഞ്ഞ ദിവസം അരിക്കൊമ്പൻ ജലസംഭരണിക്ക് സമീപം പുല്ലു പറിച്ച് കഴുകി വൃത്തിയാക്കി കഴിക്കുന്ന വീഡിയോ ദൃശ്യങ്ങൾ അധികൃതർ പുറത്തുവിട്ടിരുന്നു. ആന നിലവിൽ പൂർണ ആരോഗ്യവാനാണെന്നാണ് അധികൃതർ നൽകുന്ന വിവരം. അതേസമയം ഇന്നലെ രാത്രി മുതൽ ആനയുടെ റേഡിയോ കോളറിൽ നിന്നുള്ള സിഗ്നലുകൾ കിട്ടുന്നില്ലെന്നാണ് റിപ്പോർട്ട്.
