ന്യൂഡൽഹി: ഇന്ത്യൻ ഓഹരി വിപണി ഉയരങ്ങളിൽ. സെൻസെക്സും നിഫ്റ്റിയും ഇന്ന് റിക്കോർഡ് ഉയരത്തിലാണ് കുതിച്ചത്. സെൻസെക്സ് 63,738 വരെയും നിഫ്റ്റി 18,922 വരെയും കയറി റെക്കാർഡിട്ടു. മീഡിയ ഒഴികെ എല്ലാ മേഖലകളും രാവിലെ നേട്ടത്തിലായി.അദാനി ഗ്രൂപ്പ് ഓഹരികൾ ഇന്നു വലിയ നേട്ടം ഉണ്ടാക്കി. അദാനി എന്റർപ്രൈസസിന്റെ 1.6 ശതമാനവും ഗ്രീനിന്റെ 4.1 ശതമാനവും ഓഹരികൾ കൈ.മാറ്റം ചെയ്യപ്പെട്ടു. രണ്ടു കമ്പനികളിലും കൂടി 8500 കോടിയിൽ പരം രൂപയുടെ ഓഹരികളാണു കൈമാറിയത്.
സെൻസെക്സിൽ 210 പോയന്റും നിഫ്റ്റിയിൽ 58 പോയന്റുമാണ് നേട്ടം. ടാറ്റ മോട്ടോഴ്സ്, എസ്ബിഐ, ബജാജ് ഫിനാൻസ്, ബജാജ് ഫിൻസർവ്, ഇൻഫോസിസ്, ടൈറ്റാൻ, ഐടിസി തുടങ്ങിയ ഓഹരികളാണ് നേട്ടത്തിൽ.പലിശ നിരക്ക് വർദ്ധന താത്ക്കാലികമായി നിർത്തിവച്ചതും, പണപ്പെരുപ്പ നിരക്ക് അഞ്ച് ശതമാനത്തിൽ താഴെ എത്തിയതും, ജിഡിപി പ്രതീക്ഷിച്ചതിലും ഉയർന്നതുമാണ് രാജ്യത്തെ ഓഹരി വിപണിയിൽ പ്രതിഫലിച്ചത്.
കഴിഞ്ഞ പാദത്തിൽ പ്രതീക്ഷകളെയും കടത്തി വെട്ടിയായിരുന്നു ഇന്ത്യയുടെ ജിഡിപി വളർച്ച. ഇന്ത്യയുടെ മൊത്ത ആഭ്യന്തര ഉത്പാദനം (ജിഡിപി) കഴിഞ്ഞ സാമ്പത്തിക വർഷത്തിന്റെ അവസാന പാദത്തിൽ 6.1 ശതമാനമായിട്ടാണ് വളർന്നത്. 2022-2023 സാമ്പത്തിക വർഷത്തിലെ മൂന്നാം പാദത്തിൽ 4.4 ശതമാനമായിരുന്നു വളർച്ച, ഇതാണ് മുന്നേറി 6.1 ശതമാനത്തിലേക്ക് എത്തിയത്. സ്റ്റാറ്റിസ്റ്റിക്സ് ആന്റ് പ്രോഗ്രാം ഇംപ്ലിമെന്റേഷൻ മന്ത്രാലയമാണ് കണക്കുകൾ പുറത്ത് വിട്ടത്.
3.48 ലക്ഷം കോടി രൂപയുടെ വിപണിമൂല്യമുള്ള രാജ്യത്തെ വിപണി ലോകത്തെ തന്നെ അഞ്ചാമത്ത വലിയ ഇക്വിറ്റി മാർക്കറ്റാണ്. 2020 ഡിസംബർ പാദത്തിന് ശേഷം മൊത്തം വിപണി മൂല്യത്തിൽ ഇന്ത്യ കുത്തനെ ഉയർന്നതായി ബ്ലൂംബർഗിന്റെ കണക്കുകളും വ്യക്തമാക്കിയിരുന്നു.
Discussion about this post