എറണാകുളം: കൊച്ചി അന്താരാഷ്ട്ര വിമാനത്താവളം വഴിയുള്ള യാത്രികരുടെ യാത്ര കൂടുതൽ എളുപ്പമാക്കി എയർെൈലനായ എയർ ഇന്ത്യ എക്‌സ്പ്രസ്. യാത്രികർക്കായി എക്‌സ്പ്രസ് എഹെഡ് എന്ന പേരിലുള്ള മുൻഗണനാ സേവനങ്ങൾ ആരംഭിക്കാനാണ് വിമാനക്കമ്പനിയുടെ തീരുമാനം. ഇത് വഴി ആളുകൾക്ക് ചെക് ഇൻ കൗണ്ടറിന് മുൻപിലെ ബാഗേജിനായുള്ള ദീർഘനേരമുള്ള കാത്ത് നിൽപ്പ് അവസാനിപ്പിക്കാം.
ചെക് ഇൻ മുതൽ ലാൻഡിംഗ്‌വരെയുള്ള യാത്ര തടസ്സമില്ലാതെയാക്കുന്നതിന് വേണ്ടിയുള്ള സേവനമാണ് എക്‌സ്പ്രസ് എഹെഡ്. ഈ സേവനത്തിനായി ചെറിയ തുക നൽകേണ്ടതുണ്ട്. പ്രത്യേകം കൗണ്ടറുകൾ സ്ഥാപിച്ചാണ് എയർ ഇന്ത്യ എക്‌സ്പ്രസ് ഈ മുൻഗണനാ സേവനം നടപ്പിലാക്കുന്നത്.
തുക അടച്ചവർക്ക് ബോർഡിംഗിലും അവരുടെ ബാഗേജുകൾ കൈകാര്യം ചെയ്യുന്നതിലും മുൻഗണന നൽകുന്നതാണ് ഈ സേവനത്തിന്റെ രീതി. വിമാനം കയറുമ്പോഴും ഇറങ്ങുമ്പോഴും ഈ സേവനം ലഭ്യമാകും. വിമാനമിറങ്ങുമ്പോൾ ഇവരുടെ ബാഗേജുകൾ ആകും ആദ്യം ലഭിക്കുക.
വിമാനത്താവളത്തിൽ സജ്ജീകരിച്ചിട്ടുള്ള എക്‌സ്പ്രസ് എഹെഡ് കൗണ്ടറുകൾ വഴിയാണ് ആളുകൾക്ക് സേവനങ്ങൾ വാങ്ങാൻ കഴിയുക. ഇതിന് പുറമേ ഓൺലൈൻ ആയി മുൻകൂട്ടി ബുക്ക് ചെയ്യാനുള്ള സൗകര്യങ്ങളും ഒരുക്കിയിട്ടുണ്ട്. മൊബൈൽ ആപ്ലിക്കേഷനിലോ ഏകീകൃത എയർലൈൻ വെബ്‌സൈറ്റായ airindiaexprsse.com എന്ന വെബ്‌സൈറ്റ് വഴിയോ എക്‌സ്പ്രസ് എഹെഡ് സേവനങ്ങൾ മുൻകൂറായി ബുക്ക് ചെയ്യാം.
Discussion about this post