ബുലവായോ: സൂപ്പർ സിക്സിലെ നിർണായക മത്സരത്തിൽ സ്കോട്ട്ലൻഡിനെ 4 വിക്കറ്റിന് തകർത്ത് നെതർലൻഡ്സ് ഏകദിന ലോകകപ്പിന് യോഗ്യത നേടുന്ന പത്താമത്തെ ടീമായി. ഇതോടെ, ഇന്ത്യയിൽ നടക്കുന്ന ലോകകപ്പ് ഫൈനൽ റൗണ്ട് പോരാട്ടങ്ങളുടെ ലൈനപ്പ് പൂർണമായി. കരുത്തരായ വിൻഡീസും പരിചയ സമ്പന്നരായ സിംബാബ്വെയും യോഗ്യതാ റൗണ്ടിൽ വീണപ്പോൾ, അഗ്നിപരീക്ഷകളെ അതിജീവിച്ച് ശ്രീലങ്കയും ലോകകപ്പ് പോരാട്ടങ്ങൾക്ക് യോഗ്യത നേടി.
ബുലവായോയിലെ ക്വീൻസ് സ്പോർട്ട്സ് ക്ലബിൽ ഇന്ന് നടന്ന സൂപ്പർ സിക്സ് പോരാട്ടത്തിൽ, സ്കോട്ട്ലൻഡിനെതിരെ ആധികാരികമായ ജയമാണ് നെതർലൻഡ്സ് സ്വന്തമാക്കിയത്. ടോസ് നഷ്ടമായി ബാറ്റിംഗിന് ഇറങ്ങിയ സ്കോട്ട്ലൻഡ് നിശ്ചിത 50 ഓവറിൽ 9 വിക്കറ്റ് നഷ്ടത്തിൽ 277 റൺസെടുത്തു. മറുപടി ബാറ്റിംഗിൽ 42.5 ഓവറിൽ 6 വിക്കറ്റ് നഷ്ടത്തിൽ നെതർലൻഡ്സ് വിജയലക്ഷ്യം മറികടന്നു.
സെഞ്ച്വറി നേടിയ ബ്രാൻഡൻ മക്മുള്ളനും (106) അർദ്ധ സെഞ്ച്വറി നേടിയ ക്യാപ്ടൻ ബെറിംഗ്ടണുമാണ് (64) സ്കോട്ട്ലൻഡിന് പൊരുതാവുന്ന സ്കോർ സമ്മാനിച്ചത്. മറുവശത്ത് ബാസ് ഡിലീഡിന്റെ തകർപ്പൻ ഓൾ റൗണ്ട് പ്രകടനം നെതർലൻഡ്സിന് കരുത്തായി. ബൗളിംഗിൽ 5 വിക്കറ്റുമായി സ്കോട്ടിഷ് പടയുടെ നട്ടെല്ലൊടിച്ച ഡി ലീഡ്, ബാറ്റിംഗിൽ തകർപ്പൻ സെഞ്ച്വറി നേടി. 92 പന്തിൽ 123 റൺസ് നേടിയ ഡിലീഡിന്റെ ഇന്നിംഗ്സ് ഡച്ച് പടയുടെ നെടുംതൂണായി. ഓപ്പണർ വിക്രംജീത് സിംഗ് 40 റൺസ് നേടി.
സമ്പൂർണമായി ഇന്ത്യയിൽ നടക്കുന്ന ആദ്യ ഏകദിന ക്രിക്കറ്റ് ലോകകപ്പ് ഒക്ടോബർ 5നാണ് ആരംഭിക്കുന്നത്. അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടക്കുന്ന ആദ്യ മത്സരത്തിൽ നിലവിലെ ചാമ്പ്യന്മാരായ ഇംഗ്ലണ്ട്, റണ്ണറപ്പുകളായ ന്യൂസിലൻഡിനെ നേരിടും. ഇതേ വേദിയിൽ, നവംബർ 19നാണ് ഫൈനൽ.
Discussion about this post