കോട്ടയം : സ്‌നേഹം കൊണ്ട് ജനഹൃദയം കീഴടക്കിയ മുൻ മുഖ്യമന്ത്രി ഉമ്മൻ ചാണ്ടിക്ക് പുതുപ്പള്ളിയുടെ മണ്ണിൽ അന്ത്യ വിശ്രമം. രാപ്പകലില്ലാതെ ജനങ്ങൾക്ക് വേണ്ടി ജീവിച്ച ജനങ്ങളുടെ സ്വന്തം നേതാവിന് കേരളം വിട പറഞ്ഞു. പുതുപ്പള്ളി സെന്റ് ജോർജ് ഓർത്തഡോക്‌സ് വലിയ പള്ളിയിലെ പ്രത്യേകം തയ്യാറാക്കിയ കല്ലറയിൽ ഇനി അദ്ദേഹത്തിന് അന്ത്യ വിശ്രമമാണ്.
കേരളത്തിന്റെ എല്ലാ ഭാഗത്ത് നിന്നും പതിനായിരങ്ങളാണ് അദ്ദേഹത്തെ അവസാനമായി ഒരുനോക്ക് കാണാൻ എത്തിയത്. ആയിരങ്ങളുടെ അകമ്പടിയോടെയാണ് ഭൗതിക ദേഹം വഹിച്ചുകൊണ്ടുള്ള വിലാപയാത്ര പള്ളിയിലേക്ക് എത്തിച്ചത്. തുടർന്ന് പള്ളിയിലെ അന്ത്യ ശുശ്രൂഷകൾക്ക് ശേഷം മകൻ ചാണ്ടി ഉമ്മൻ എല്ലാവർക്കും നന്ദി അറിയിച്ചു.
ഇതെല്ലാം കണ്ടുനിന്ന ജനങ്ങൾക്ക് വെറുതെ നിൽക്കാനായില്ല. അവർ നേതാവിന് കണ്ണീരിൽ കുതിർന്ന ആദരാഞ്ജലികൾ അർപ്പിച്ചു. ‘ഇല്ല, ഇല്ല മരിക്കുന്നില്ല, ഉമ്മൻ ചാണ്ടി മരിക്കുന്നില്ല.. കണ്ണേ കരളേ കുഞ്ഞൂഞ്ഞേ…’ എന്നവർ ഒരേ ശബ്ദത്തോടെ പറഞ്ഞു.
സാധാരണക്കാരനായി ജനിച്ച ഞാൻ സാധാരണക്കാരനായി ജീവിക്കും, സാധാരണക്കാരനായി തന്നെ മരിക്കും” എന്ന ആ വാക്കുകൾ അനുസ്മരിച്ചുകൊണ്ട് തന്നെ ആചാരവെടിയും ഔദ്യോഗിക ബഹുമതിയും വേണ്ടെന്നുവച്ചു. എന്നാൽ പുതുപ്പള്ളിയിലേക്കുള്ള ജനപ്രവാഹം ഇനിയും അവസാനിച്ചിട്ടില്ല. ജനങ്ങൾക്കൊപ്പം നിന്ന നേതാവിനെ ജനങ്ങൾ ഒരിക്കലും മറക്കില്ല എന്ന് തെളിയിക്കുന്നതായിരുന്നു അദ്ദേഹത്തിന്റെ വിടവാങ്ങൾ ചടങ്ങ്.
Discussion about this post