പതിമൂന്നാം നൂറ്റാണ്ടിൽ ജീവിച്ചിരുന്ന സെൻ ഗുരു മുജു എഴുതിയ ഷസേകി-ഷു എന്ന കൃതിയിൽ നിന്നാണ് പ്രധാനമായും ഇന്ന് നമ്മൾ കാണുന്ന സെൻ കഥകളെല്ലാം വിവർത്തനം ചെയ്യപ്പെട്ടത്. ജപ്പാനിലെ മറ്റ് സെൻ ഗുരുക്കന്മാരുടെ കൃതികളിലും ഇത്തരം കഥകൾ കണ്ടെത്താനാകും. ധ്യാനിക്കാനാണ് ഈ കഥകൾ ഉപയോഗിക്കുന്നത്.
ഇന്നത്തെ ധ്യാന കഥ
ഓ അങ്ങനെയോ?
ഹകുവിൻ എന്നൊരു ധ്യാനഗുരുവുണ്ടായിരുന്നു. പരിശുദ്ധമായ ജീവിതം നയിച്ചുപോന്ന അദ്ദേഹത്തെ ഗ്രാമവാസികൾ വളരെയധികം ഇഷ്ടപ്പെട്ടു, ആദരിച്ചു.
ഗ്രാമത്തിലെ പ്രധാന വ്യാപാരിയായിരുന്നു അദ്ദേഹത്തിൻ്റെ അയൽക്കാരൻ. അയൽക്കാരൻ്റെ മകളായ, അവിവാഹിതയായ സുന്ദരി ഗർഭിണിയാണെന്ന് ഒരുനാൾ വീട്ടുകാർ കണ്ടെത്തി.
പെൺകുട്ടിയെ ചോദ്യം ചെയ്തു. ആദ്യമൊന്നും അവൾ ഉത്തരവാദി ആരാണെന്ന് പറഞ്ഞില്ല. ചോദ്യം ചെയ്യൽ കഠിനമായപ്പോൾ അവൾ പറഞ്ഞു. ‘ഗർഭത്തിനുത്തരവാദി ഹകുവിൻ ഗുരു ആണ്’.
എല്ലാവരും അമ്പരന്നു. മാതാപിതാക്കൾ നാട്ടുകാരുമൊത്ത് ഗുരുവിൻ്റെ കുടിലിലേക്ക് ചെന്നു. വളരെനേരം ഭർത്സിച്ച ശേഷം കാര്യങ്ങൾ പറഞ്ഞു.
അദ്ദേഹം ചോദിച്ചു: ‘ഓ അങ്ങനെയോ?’
പെൺകുട്ടിയേയും ജനിക്കാനിരിക്കുന്ന കുഞ്ഞിനേയും കൈയ്യേൽക്കണമെന്ന് നാട്ടുകാർ വിധിച്ചു. പിറ്റേന്ന് മുതൽ ആ പെൺകുട്ടി ഹകുവിൻ്റെ കുടിലിൽ താമസമായി.
നാളുകൾ കഴിഞ്ഞു
പ്രസവം കഴിഞ്ഞു. ഗുരു വളരെ പണിപ്പെട്ട് രാവുപകൽ പണിയെടുത്ത് പണമുണ്ടാക്കി കുട്ടിയ്ക്കും അമ്മക്കും വേണ്ടതെല്ലാം എത്തിച്ചു. കുഞ്ഞിനെ പൊന്നുപോലെ നോക്കി. യുവതിയേയും സ്നേഹമോടെ പരിചരിച്ചു. കുഞ്ഞിന് ഹകുവിനോടായിരുന്നു ഏറ്റവും ഇഷ്ടം.
കുഞ്ഞിനും അമ്മക്കും വേണ്ടതെല്ലാമുണ്ടാക്കാൻ കഠിനാധ്വാനം ചെയ്യുന്ന ഹകുവിനെ നാട്ടുകാരെല്ലാം കളിയാക്കി. വഴിപിഴച്ച ഗുരുവിനെ അങ്ങാടിയിൽ വച്ച് അസഭ്യം പറഞ്ഞു. ഒരിക്കൽ ചീമുട്ടയെറിയുക പോലുമുണ്ടായി. ഹകുവിൻ ഒന്നും പറഞ്ഞില്ല.
ഇതൊക്കെ ആ യുവതിക്ക് സഹിക്കാവുന്നതിനപ്പുറമായിരുന്നു. ചന്തയിലെ മറ്റൊരു വ്യാപാരിയുടെ മകനായിരുന്നു കുഞ്ഞിൻ്റെ അച്ഛൻ. കുടുംബങ്ങൾ തമ്മിൽ ശത്രുതയുണ്ടായതുകൊണ്ടാണ് അവരിരുവരും കാര്യം രഹസ്യമാക്കി വച്ചത്. പെൺകുട്ടിയും കാമുകനും വിവരങ്ങളെല്ലാം മാതാപിതാക്കളെ ധരിപ്പിച്ചു. എല്ലാവർക്കും കൊടിയ പശ്ചാത്താപമുണ്ടായി. നാട്ടുകാരും വീട്ടുകാരും യുവതിയും കാമുകനും ഒരുമിച്ച് ഹകുവിൻ്റെ കുടിലിനു മുന്നിലെത്തി അദ്ദേഹത്തോട് മാപ്പിരന്നു സാഷ്ടാംഗ നമസ്കാരം ചെയ്തു.
ഹകുവിൻ കുഞ്ഞിനെ കളിപ്പിച്ചുകൊണ്ടിരിക്കുകയായിരുന്നു. കുഞ്ഞിനെ അമ്മയുടെ കൈയ്യിൽ ഏൽപ്പിച്ചു.
അദ്ദേഹം ചോദിച്ചു: ‘ഓ അങ്ങനെയോ?’
Discussion about this post