ഓസ്കാര് പുരസ്കാരം ലഭിച്ച ദി എലിഫന്റ് വിസ്പേഴ്സ് എന്ന ഡോക്യുമെന്ററിയിലൂടെ പ്രശസ്തരായവരാണ് ബൊമ്മനും ബെല്ലിയും. അനാഥനായ ഒരു ആനക്കുട്ടിയും അതിന്റെ സംരക്ഷകരായ ആദിവാസി ദമ്പതികളും തമ്മിലുള്ള അഭേദ്യമായ ബന്ധമാണ് എലിഫന്റ് വിസ്പറേഴ്സിന്റെ പ്രമേയം. എന്നാല് ഇതിന്റെ ചിത്രീകരണ സമയത്ത് സംവിധായിക കാര്ത്തികി ഗോണ്സാല്വസ് നല്കിയ വാഗ്ദാനങ്ങള് ഒന്നും പാലിക്കപ്പെട്ടിട്ടില്ല എന്ന് കാണിച്ചാണ് ഇപ്പോള് വക്കീല് നോട്ടീസ് അയച്ചിരിക്കുന്നത്. നഷ്ടപരിഹാരത്തുകയായി രണ്ട് കോടി രൂപയാണ് ഇവര് സംവിധായികയോട് ആവശ്യപ്പെടുന്നത്.
ചിത്രീകരണ സമയം അടിസ്ഥാനമാക്കി ചിത്രത്തില് നിന്ന് ലഭിക്കുന്ന വരുമാനത്തിന്റെ ഒരു പങ്ക് ഇവര്ക്ക് നല്കാമെന്നാണ് കാര്ത്തികി പറഞ്ഞിരുന്നത്. ദമ്പതികള്ക്കായി എല്ലാവിധ സൗകര്യങ്ങളോട് കൂടിയ വീടും വാഹനവും ഇതില് ഉള്പ്പെടുന്നു. കൂടാതെ വിശദമാക്കാത്ത ഒരു തുക സഹായമായി നല്കാമെന്നുമാണ് പറഞ്ഞിരുന്നതെന്നും നോട്ടീസില് പറയുന്നു. എന്നാല് ഇവയൊന്നും ലഭിച്ചിട്ടില്ലെന്ന് കാട്ടിയാണ് ഇപ്പോഴത്തെ നിയമ നടപടി.
കൂടാതെ ഈ ദമ്പതികളെ യഥാര്ത്ഥ നായകന്മാരാക്കി പ്രശസ്തരായ സെലിബ്രിറ്റികള്, കായികതാരങ്ങള്, രാഷ്ട്രീയ നേതാക്കളെയൊക്കെ പരിചയപ്പെടുത്തി സിനിമയ്ക്ക് വന് പ്രചാരണം നേടിക്കൊടുത്തു. ഇതിന്റെ ഭാഗമായി നിര്മ്മാതാക്കള്ക്ക് എല്ലാ വിധ സാമ്പത്തിക സഹായങ്ങളും വിവിധയിടങ്ങളില് നിന്ന് ലഭിച്ചുവെന്നും നോട്ടീസില് പറയുന്നു. പ്രധാനമന്ത്രിയില് നിന്നും തമിഴ്നാട് മുഖ്യമന്ത്രിയില് നിന്നും വരെ സാമ്പത്തിക സഹായങ്ങള് ലഭിച്ചതായി നോട്ടീസില് ചേര്ത്തിട്ടുണ്ട്.
ബൊമ്മനും ബെല്ലിയും ഗോണ്സാല്വസിന്റെ പ്രവര്ത്തകളില് നിരാശരാണ്, അവര് സിനിമ നിര്മ്മിക്കുമ്പോള് സാമ്പത്തിക സഹായവും ബെല്ലിയുടെ ചെറുമകളുടെ വിദ്യാഭ്യാസത്തിനുള്ള സഹായവും വാഗ്ദാനം ചെയ്തിരുന്നു. എന്നാല് സിനിമ നേടിയ ഭീമമായ ലാഭത്തിന്റെ ഒരംശം പോലും നല്കാന് അവര് ഇപ്പോള് വിസമ്മതിക്കുകയാണെന്നും ചെന്നൈ ആസ്ഥാനമായുള്ള സാമൂഹിക പ്രവര്ത്തകനും അഭിഭാഷകനുമായ പ്രവീണ് രാജ് പറയുന്നു. തനിക്ക് ദമ്പതികളെ ഏകദേശം ഒരു ദശാബ്ദമായി അറിയാമെന്നും, പരാതിയുമായി ദമ്പതികള് സമീപിച്ചപ്പോള് ചെന്നൈയിലെ ഒരു നിയമ സ്ഥാപനവുമായി താന് അവരെ ബന്ധപ്പെടുത്തി നല്കിയതായും അദ്ദേഹം കൂട്ടിച്ചേര്ക്കുന്നു.
സിനിമ നന്നായി വരുമ്പോള് എല്ലാവര്ക്കും ഒരുപോലെ അഭിവൃദ്ധി ഉണ്ടാകുമെന്ന പ്രതീക്ഷയില് ദമ്പതികള് ഡോക്യുമെന്ററി സംവിധായിക പറയുന്നതെല്ലാം അനുസരിക്കുകയും വേണ്ടുന്ന കാര്യങ്ങള് ചെയ്ത് നല്കുകയും ചെയ്തു. എന്നാല് ഇപ്പോള് ബൊമ്മന് വിളിക്കുമ്പോള് പോലും ഗോണ്സാല്വസ് ഫോണ് എടുക്കുന്നില്ലെന്നും രാജ് കൂട്ടിച്ചേര്ത്തു.
അതേസമയം, കാര്ത്തികി ഗോണ്സാല്വസിന് വേണ്ടി സിഖ്യ എന്റര്ടൈന്മെന്റ് പ്രൈവറ്റ് ലിമിറ്റഡില് നിന്ന് നാല് ദിവസം മുമ്പ് തനിക്ക് മറുപടി നോട്ടീസ് ലഭിച്ചതായി കേസ് കൈകാര്യം ചെയ്യുന്ന അഭിഭാഷകന് മുഹമ്മദ് മന്സൂര് പറഞ്ഞു. അതിന് പ്രകാരം, താന് ഇതിനകം ദമ്പതികള്ക്ക് പണം നല്കിയിട്ടുണ്ടെന്നും കൂടുതല് സഹായമൊന്നും നല്കാന് കഴിയില്ലെന്നുമാണ് കാര്ത്തികിയുടെ നിലപാട്. ദമ്പതികളുമായി കൂടിയാലോചിച്ചതിന് ശേഷം തുടര് നടപടികളിലേക്ക് കടക്കുമെന്നും മുഹമ്മദ് മന്സൂര് അറിയിച്ചു.
എന്നാല്, സിഖ്യ എന്റര്ടൈന്മെന്റ് പ്രൈവറ്റ് ലിമിറ്റഡ് മാദ്ധ്യമ പ്രവര്ത്തകര്ക്കായി വിഷയത്തില് പരസ്യ പ്രസ്താവനയിറക്കി. ആനകളുടെ സംരക്ഷണവും വനംവകുപ്പിന്റെയും പാപ്പാന്മാരുമായ ബൊമ്മന്, ബെല്ലി എന്നിവരുടെ അപാരമായ പരിശ്രമങ്ങള് ഉയര്ത്തിക്കാട്ടുക എന്നതായിരുന്നു എലിഫന്റ് വിസ്പേഴ്സിന്റെ ലക്ഷ്യം. ലോഞ്ച് ചെയ്തതു മുതല്, ഡോക്യുമെന്ററി അതിന്റെ കാരണത്തെക്കുറിച്ചുള്ള അവബോധം വളര്ത്തിയെടുക്കുകയും പാപ്പാന്മാരിലും കവാഡി സമൂഹത്തിലും യഥാര്ത്ഥ സ്വാധീനം ചെലുത്തുകയും ചെയ്തു.
സംസ്ഥാനത്തെ ആനകളെ പരിപാലിക്കുന്ന 91 പാപ്പാന്മാരെയും കവാഡികളെയും സഹായിക്കുന്നതിനും സംരക്ഷകര്ക്ക് പരിസ്ഥിതി സൗഹൃദ വീടുകള് നിര്മ്മിക്കുന്നതിനും ആനമല കടുവാ സങ്കേതത്തില് ആന ക്യാമ്പ് വികസിപ്പിക്കുന്നതിനും തമിഴ്നാട് മുഖ്യമന്ത്രി എം കെ സ്റ്റാലിന് സംഭാവനകള് നല്കിയിട്ടുണ്ട്. ഡോക്യുമെന്ററി ഇന്ത്യയിലുടനീളമുള്ളവര് ആഘോഷിച്ചു, കൂടാതെ ബൊമ്മന്, ബെല്ലി തുടങ്ങിയ പാപ്പാന്മാരുടെ പ്രവര്ത്തനത്തിനും ലഭിച്ച അംഗീകാരമാണ് അക്കാദമി അവാര്ഡ്. എന്നാല് അവര് ഉന്നയിച്ച എല്ലാ അവകാശവാദങ്ങളും അസത്യമാണ്. ഈ സ്റ്റോറിയുടെ എല്ലാ സംഭാവകരോടും ഞങ്ങള്ക്ക് ആഴമായ ബഹുമാനമുണ്ട്, ഒപ്പം നല്ല മാറ്റം സൃഷ്ടിക്കാനുള്ള ആഗ്രഹത്താല് നയിക്കപ്പെടുകയും ചെയ്യുന്നു എന്നും പ്രസ്താവനയില് പറയുന്നു.
Discussion about this post