റാഞ്ചി : ജീവിതത്തിൽ ഉന്നതങ്ങളിൽ എത്തുമ്പോൾ ജന്മനാട് വിട്ട് വലിയ നഗരങ്ങളിലേക്ക് ചേക്കേറുന്നവരാണ് ഭൂരിഭാഗവും. ഇന്ത്യയിലെ ഏറ്റവും താരമൂല്യമുള്ള ക്രിക്കറ്റർ ആയിരുന്നപ്പോഴും തന്റെ സ്വന്തം ജന്മദേശത്ത് തന്നെ വീട് ഒരുക്കി താമസിക്കുന്ന ഒരാളുണ്ട്. മറ്റാരുമല്ല ഇന്ത്യയുടെ ക്യാപ്റ്റൻ കൂൾ ആയ മഹേന്ദ്ര സിംഗ് ധോണിയാണ് അത്. ജന്മനഗരമായ റാഞ്ചിക്ക് അദ്ദേഹത്തിന്റെ ഹൃദയത്തിൽ അത്രമേൽ ആഴത്തിലുള്ള സ്ഥാനമുണ്ട്. നഗരത്തിന്റെ ഹൃദയഭാഗത്തായി ഒരു ആഡംബര ഫാംഹൗസ് ആണ് എം എസ് ധോണി തനിക്കും കുടുംബത്തിനും ആയി ഒരുക്കിയിരിക്കുന്നത്.
റാഞ്ചിയിലെ റിംഗ് റോഡിലെ ഒരു സുപ്രധാന സ്ഥലത്തായി സ്ഥിതിചെയ്യുന്ന ഈ ഫാം ഹൗസിന് 6 കോടി രൂപ വില മതിപ്പാണുള്ളത്. സാക്ഷാൽ പരമശിവന്റെ നാമധേയമായ ‘കൈലാസ്പതി’ എന്നാണ് തന്റെ വീടിന് ധോണി പേര് നൽകിയിരിക്കുന്നത്. 7 ഏക്കർ വിസ്തൃതിയിലാണ് ഈ മനോഹരമായ ഫാം ഹൗസ് സ്ഥിതി ചെയ്യുന്നത്. ആഡംബരപൂർണമായ ഫാംഹൗസിനുള്ളിൽ ഒരു അത്യാധുനിക ജിംനേഷ്യം, ക്രിക്കറ്റിനുള്ള നെറ്റ് പ്രാക്ടീസ് ഫീൽഡ്, ഒരു നീന്തൽക്കുളം, ഇൻഡോർ സ്റ്റേഡിയം എന്നിവയെല്ലാം ഒരുക്കിയിട്ടുണ്ട്. കൂടാതെ അതിഥികൾക്കായി ഒരു പഞ്ച നക്ഷത്ര ഹോട്ടൽ സൗകര്യവും ഇവിടെയുണ്ട്.
മൂന്നുവർഷം എടുത്താണ് ഈ ഫാം ഹൗസ് നിർമ്മാണം പൂർത്തിയായത്. പ്രകൃതിയെ സ്നേഹിക്കുന്നതിൽ അതീവ തല്പരനായ ധോണി അദ്ദേഹത്തിന്റെ ഭൂമിയുടെ ഭൂരിഭാഗവും മരങ്ങളും ചെടികളും പുൽത്തകിടികളും എല്ലാമായി പച്ചപ്പണിയിപ്പിച്ചു നിർത്തിയിട്ടുണ്ട്. വീടിനു പുറത്തു മാത്രമല്ല അകത്തും ധാരാളം ഇൻഡോർ ചെടികൾ നിറഞ്ഞു നിൽക്കുന്നുണ്ട്. ധാരാളം പച്ചപ്പ് നിറഞ്ഞ ശാന്ത സുന്ദരമായ പ്രകൃതി തന്നെയാണ് ഈ ഫാം ഹൗസിനെ കൂടുതൽ മനോഹരമാക്കുന്നത്.
Discussion about this post