മുംബൈ : ബാംഗ് ബാംഗിനും വാറിനും പഠാനും ശേഷം സിദ്ധാർത്ഥ് ആനന്ദ് സംവിധാനം ചെയ്യുന്ന പുതിയ സിനിമ ഫൈറ്ററിന്റെ മോഷൻ പോസ്റ്റർ പുറത്തുവിട്ടു. സ്റ്റൈലിഷ് ലുക്കിൽ ഹൃത്വിക് റോഷനും ദീപിക പദുക്കോണും ഒപ്പം അനിൽ കപൂറുമടങ്ങുന്ന പോസ്റ്ററാണ് പുറത്തുവിട്ടത്. എഫ് – 18 വിമാനങ്ങൾ പറക്കുന്നതിനൊപ്പം പശ്ചാത്തലത്തിൽ വന്ദേമാതര ഗാനവും മോഷൻ പോസ്റ്ററിൽ ഉൾക്കൊള്ളിച്ചിട്ടുണ്ട്.
സ്വാതന്ത്ര്യ ദിനത്തിലാണ് മോഷൻ പോസ്റ്റർ പുറത്തുവിട്ടത്. വിമാനങ്ങളിൽ നിന്ന് നേരേ ഹൃത്വികിലേക്ക് പോകുന്ന രീതിയിലാണ് മോഷൻ പോസ്റ്റർ. പിന്നെ ദീപികയേയും അനിൽ കപൂറിനേയും കാണിക്കുന്നു. എല്ലാവരും വ്യോമസേന യൂണിഫോമുകളും അണിഞ്ഞിട്ടുണ്ട്.
അത്യാധുനിക സാങ്കേതിക വിദ്യകൾ ഉപയോഗിച്ചാണ് ചിത്രത്തിന്റെ ചിത്രീകരണം. വ്യോമസേന കേഡറ്റുകൾ സിനിമയിൽ പ്രവർത്തിച്ചിട്ടുണ്ടെന്നാണ് റിപ്പോർട്ട്. വിശാൽ- ശേഖർ ഒരുക്കുന്ന അഞ്ച് ഗാനങ്ങളാണ് സിനിമയിലുള്ളത്. സത്ജിത് പൗലോസാണ് സിനിമാട്ടോഗ്രാഫി ചെയ്തിരിക്കുന്നത്.
2022 സെപ്റ്റംബർ 20 നായിരുന്നു ഫൈറ്റർ റിലീസ് തീയതി നിശ്ചയിച്ചിരുന്നത്. എന്നാൽ കൊറോണ കാരണം ഷൂട്ടിംഗ് നീണ്ടു പോവുകയായിരുന്നു. ബോളിവുഡ് ഇതുവരെ കാണാത്ത ആക്ഷൻ രംഗങ്ങളും വ്യോമയുദ്ധവും ഫൈറ്ററിലുണ്ടാകുമെന്നാണ് സംവിധായകൻ വ്യക്തമാക്കുന്നത്. ഈ സിനിമക്കായി ഹൃത്വികും ദീപികയും പ്രത്യേകം മാർഷ്യൽ ആർട്സ് ട്രെയിനിംഗ് നടത്തിയിരുന്നു. 2024 ലെ റിപ്പബ്ലിക് ദിനത്തിനു തൊട്ടു മുന്നെ ജനുവരി 25 നായിരിക്കും ഫൈറ്റർ തിയറ്ററുകളിലെത്തുക.
Discussion about this post