ഇടുക്കി: ഭൂപതിവ് ചട്ടം ഭേദഗതി ചെയ്യണമെന്ന് ആവശ്യപ്പെട്ട് ഇടുക്കിയിൽ ഇന്ന് കോൺഗ്രസ് ഹർത്താൽ. രാവിലെ ആറ് മണിയ്ക്ക് ആരംഭിച്ച ഹർത്താൽ വൈകീട്ട് ആറുവരെയാണ്. ഹർത്താലിന്റെ പശ്ചാത്തലത്തിൽ ഇന്ന് നടത്താനിരുന്ന പരീക്ഷകൾ എംജി സർവ്വകലാശാല മാറ്റിവച്ചു.
ഇടുക്കിയിൽ 1964 ലെയും 1993 ലെയും ഭൂമി പതിവ് ചട്ടം ഭേദഗതി ചെയ്യുകയെന്ന് ആവശ്യപ്പെട്ടാണ് ഹർത്താലിന് കോൺഗ്രസ് ആഹ്വാനം ചെയ്തത്. 13 പഞ്ചായത്തുകളിൽ ഏർപ്പെടുത്തിയിരിക്കുന്ന നിർമ്മാണ നിയന്ത്രണം പിൻവലിക്കുക, പട്ടയ നടപടികൾ പുനരാരംഭിക്കുക, വന്യമൃഗ ശല്യത്തിൽ നിന്നും കർഷകരെ രക്ഷിക്കാൻ നടപടി സ്വീകരിക്കുക തുടങ്ങി വിവിധ ആവശ്യങ്ങൾ ഉന്നയിച്ചാണ് ഇന്ന് ഹർത്താൽ നടത്തുന്നത്. രാവിലെ ഹർത്താലിന്റെ ഭാഗമായി പ്രവർത്തകർ പ്രകടനം നടത്തും. ഹർത്താലിൽ നിന്നും അവശ്യസേവനങ്ങളെ ഒഴിവാക്കിയിട്ടുണ്ട്.
ഇടുക്കിയിൽ ഇന്ന് സ്കൂളുകൾക്ക് അവധിയാണ്. അതിനാൽ ഇന്ന് നടത്താനിരുന്ന പരീക്ഷകൾ 25 ലേക്ക് മാറ്റിയിട്ടുണ്ട്. ഓണമായതിനാൽ ഹർത്താലിന്റെ പേരിൽ കടകൾ അടച്ചിടുന്നത് വൻ നഷ്ടമുണ്ടാക്കുമെന്നും, അതിനാൽ കടകൾ തുറക്കുമെന്നും വ്യാപാര വ്യവസായ ഏകോപന സമിതി വ്യക്തമാക്കിയിരുന്നു. അതിനാൽ ഇന്ന് കടകൾ തുറന്നു പ്രവർത്തിക്കും.
