കീഴ്ശ്വാസം നാണം കെടുത്തുന്നുവോ; ഗ്യാസ്, ട്രബിളാകാതെ മാറാൻ ഈ കാര്യങ്ങൾ മാത്രം ശ്രദ്ധിക്കൂ

ഗ്യാസ് ട്രബിൾ എന്നത് ചെറിയ രീതിയിലുള്ള ദഹന വൈകല്യമാണ്, ഇത് സാധാരണയായി ഗുരുതരമായ ആരോഗ്യപ്രശ്‌നങ്ങളൊന്നും ഉണ്ടാക്കില്ലെങ്കിലും അവഗണിച്ചാൽ, അത് സങ്കീർണ്ണമായേക്കാം. പലപ്പോഴും പൊതുഇടങ്ങളിൽ അധോവായു ആളുകളെ നാണം കെടുത്താറുണ്ട്. എന്നാൽ ഇത് സാധാരണ ദഹനപ്രക്രിയയാണെന്നും തികച്ചും സാധാരണമാണെന്നുമാണ് ആദ്യം മനസിലാക്കേണ്ടത്.

വയറിന് കട്ടി, ഓക്കാനം, കീഴ്വായു, വിശപ്പില്ലായ്മ, വയർ വീർത്ത തോന്നൽ എന്നതെല്ലാം ഗ്യാസ് ട്രബിളുള്ളവർക്ക് ഉണ്ടാകും. നമ്മുടെ ദഹനം നടക്കുമ്പോൾ വയറ്റിൽ കൂടുതൽ അളവിൽ ഗ്യാസുണ്ടാകുന്നതാണ് ഇതിന് കാരണം. ഇത് ചിലരിൽ നിരന്തരം കീഴ് വായുവായി പോകും. ചിലരിൽ ഇത് വയറ്റിൽ കെട്ടിക്കിടക്കും. ഇത്തരം ഗ്യാസ് ട്രബിൾ പ്രശ്നം ഇല്ലാതിരിയ്ക്കാൻ നമുക്കു ചെയ്യാവുന്ന ചില കാര്യങ്ങളുണ്ട്.

ആദ്യമായി വേണ്ടത് കൃത്യ സമയത്ത് ഭക്ഷണം കഴിയ്ക്കുക എന്നതാണ്. ഭക്ഷണം സമയത്ത് കഴിയ്ക്കാതെ വയർ ഒഴിച്ചിട്ടാൽ ഈ അവസ്ഥയുണ്ടാകാൻ സാധ്യതയേറെയാണ്. കഴിച്ച ഉടൻ കിടക്കരുത്. ഇതു പോലെ കഠിന വ്യായാമം അരുത്. എന്നാൽ നടക്കുക പോലെയുള്ളവ ചെയ്യാം. അധികം കീഴ് വായു പ്രശനമുള്ളവർ മണ്ണിനടിയിൽ വളരുന്ന ഭക്ഷണങ്ങൾ കഴിയ്ക്കാതിരിയ്ക്കുക. ചേന, ചേമ്പ്, കിഴങ്ങ് എന്നിവ ഇതിൽ പെടും.ചൂടും എരിവും കൂടുതലുള്ള ഭക്ഷണപദാർത്ഥങ്ങൾ, മദ്യപാനം, പുകവലി, രാത്രി വൈകിയുള്ള ഭക്ഷണം, വയറു നിറച്ചുള്ള ഭക്ഷണം, പയറു വർഗ്ഗങ്ങൾ, കിഴങ്ങുവർഗങ്ങൾ, പാൽ, മധുരപലഹാരങ്ങൾ, ബേക്കറി പലഹാരങ്ങൾ, ഉള്ളി, തക്കാളി, ചോക്ലേറ്റ് എന്നിവ നിയന്ത്രിക്കുക

ഭക്ഷണം കഴിച്ചാൽ അൽപം ജീരകം വായിലിട്ടു നല്ലതു പോലെ ചവച്ചരച്ച് കഴിയ്ക്കാം. ഇതു പോലെ ഇഞ്ചി കഴിയ്ക്കുന്നത് നല്ലതാണ്. ഇഞ്ചിച്ചായ പോലുള്ളവ നല്ലതാണ്. ഇതു പോലെ മഞ്ഞൾ, പുതിന എന്നിവയെല്ലാം തന്നെ നല്ലതാണ്. ഇതു പോലെ നല്ലതു പോലെ സാലഡുകളും ഇലക്കറികളുമല്ലൊം കഴിയ്ക്കാം. ഇതെല്ലാം നല്ല ദഹനത്തിനും ഇതു വഴി ഗ്യാസ് ട്രബിൾ ഒഴിവാക്കാനും നല്ലതാണ്.

മല്ലിയോ മല്ലിയിലയോ ഉപയോഗിക്കുക. മല്ലിയിലയാണെങ്കിൽ ഏതാനും ഉണങ്ങിയ ഇലകളെടുത്ത് ചൂടുവെള്ളത്തിലിട്ട ശേഷം കുടിക്കാം. മല്ലിയാണ് ഉപയോഗിക്കുന്നതെങ്കിൽ അൽപം വറുത്ത മല്ലി മോരിൽ ചേർത്ത് കഴിക്കാം.

വെളുത്തുള്ളി പാലിൽ ചതച്ചിട്ട് കുടിക്കുന്നത് ഗ്യാസ് ട്രബിൾ അകറ്റാൻ നല്ലൊരു പ്രതിവിധിയാണ്. രണ്ട് അല്ലി വെളുത്തുള്ളി ചുട്ട് ചതച്ച് കഴിക്കുന്നത് ഗ്യാസ് ട്രബിൾ അകറ്റും.

എന്നാൽ രണ്ട് ആഴ്ച കഴിഞ്ഞിട്ടും മാറാത്ത ഗ്യാസ്ട്രബിൾ, ഭക്ഷണം ഇറക്കാൻ ബുദ്ധിമുട്ട്, തൂക്കകുറവ്, അമിതക്ഷീണം, വിശപ്പില്ലായ്മ എന്നീ ലക്ഷണങ്ങൾ പ്രത്യേകം ശ്രദ്ധിക്കുക. മറ്റെന്തെങ്കിലും അസുഖത്തിന്റെ സൂചനയാവാം അത്.