പ്രേക്ഷകർ ഏറെ ആകാംക്ഷയോടെ കാത്തിരിക്കുന്ന സൂപ്പർസ്റ്റാർ മോഹൻലാൽ നായകനാകുന്ന ബിഗ് ബജറ്റ് ചിത്രം ‘എംപുരാൻ’ പൂജ ഡൽഹിയിൽ നടന്നു.
മോഹൻലാൽ, പൃഥ്വിരാജ്, മുരളി ഗോപി, ആന്റണി പെരുമ്പാവൂർ, സുപ്രിയ മേനോൻ, ശാന്തി ആന്റണി തുടങ്ങിയവർ പങ്കെടുത്തു. ലൂസിഫർ സിനിമയുടെ ആദ്യ ഭാഗത്തു പ്രത്യക്ഷപ്പെടുന്ന റോബ് എന്ന കഥാപാത്രത്തെ അവതരിപ്പിച്ച അലക്സ് ഒ നെൽ എന്ന ഇംഗ്ലീഷ് നടനും പൂജയിൽ പങ്കെടുത്തു. കേവലം ഒരു ദിവസത്തെ ചിത്രീകരണം മാത്രമാണ് ഡൽഹിയിൽ ഉണ്ടാവുക. ശേഷമുള്ള ഒരു മാസത്തെ ചിത്രീകരണം ലഡാക്കിലാണെന്നാണ് ലഭ്യമായ വിവരം. പ്രേക്ഷകർ ആകാംഷയോടെ കാത്തിരിക്കുന്ന ചിത്രമാണ് എംപുരാന്.
ലൂസിഫറിന്റെ രചന നിർവഹിച്ച മുരളി ഗോപിതന്നെയാണ് ഈ ചിത്രത്തിന്റെയും കഥയും തിരക്കഥയും. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് നിർമ്മാണം. സുരേഷ് ബാലാജിയും ജോർജ് പയസ് തറയിലും ചേർന്നുള്ള വൈഡ് ആംഗിൾ ക്രിയേഷൻസാകും ലൈൻ പ്രൊഡക്ഷൻ. കച്ചവട സാദ്ധ്യതകൾ പരിഗണിച്ച് മലയാള സിനിമയെന്ന നിലയിൽ മാത്രമാകില്ല ‘എംപുരാൻ’ ആസൂത്രണം ചെയ്യുന്നത്. തിയറ്ററിലും ഒടിടിയിലും വൻ ബിസിനസ് ലഭിച്ച ലൂസിഫറിന്റെ രണ്ടാം ഭാഗമായതിനാൽ ഹോളിവുഡ് ചിത്രത്തിനു സമാനമായ ലൊക്കേഷനും ചിത്രീകരണവുമാണ് ആസൂത്രണം ചെയ്യുന്നത്.
Discussion about this post