തിരുവനന്തപുരം: മതിയായി ഉറങ്ങാതെ രാവിലെ വ്യായാമം ചെയ്യുന്നവർക്ക് മുന്നറിയിപ്പുമായി ഐഎംഎ സംസ്ഥാന അദ്ധ്യക്ഷൻ സുൽഫി നൂഹ്. ഏഴ് മണിക്കൂറെങ്കിലും രാത്രി ഉറങ്ങാതെ വ്യായാമം ചെയ്യുന്നത് ആരോഗ്യത്തെ ബാധിക്കുമെന്ന് അദ്ദേഹം പറഞ്ഞു. ഫേസ്ബുക്ക് കുറിപ്പിലൂടെയായിരുന്നു മതിയായി ഉറങ്ങാത്തവർക്ക് നിർദ്ദേശവുമായി അദ്ദേഹം രംഗത്ത് എത്തിയത്.
ഏഴ് മണിക്കൂറെങ്കിലും ഉറങ്ങാതെ രാവിലെ മണിക്കൂറുകൾ നടന്നിട്ട് കാര്യമില്ലെന്ന് അദ്ദേഹം ഫേസ്ബുക്കിൽ കുറിച്ചു. സൂപ്പർ സ്റ്റാർ ആയാലും എട്ട് മണിക്കൂർ നിർബന്ധമായി ഉറങ്ങണം. ഉറക്കത്തിന്റെ എല്ലാ ഘട്ടങ്ങളിലൂടെയും നല്ലോണം കടന്നുപോണം. ഓർമ്മശക്തിയും ബുദ്ധിശക്തിയും ശരീരവും മനസ്സും സർവ്വതും രോഗവിമുക്തമാകും. രോഗ പ്രതിരോധശേഷിയെങ്കിലും കൂടും. ഏറ്റവും വലിയ ഇമ്മ്യൂണിറ്റി ഗുളിക ഉറക്കമാണെന്നും അദ്ദേഹം വ്യക്തമാക്കി.
ഫേസ്ബുക്ക് കുറിപ്പിന്റെ പൂർണരൂപം
ഉറങ്ങാതെ ഓടുന്നവരോട് !??
നാലു മണിക്കൂറും അഞ്ചുമണിക്കൂറും മാത്രം ഉറങ്ങി അതിരാവിലയെണീറ്റ്, ഓടുന്നവരോടാണ്, നടക്കുന്നവരോടാണ്!
ഫൈവ് എ എം ക്ലബ് ഒക്കെ നല്ലതാണ്.
പക്ഷേ എട്ടുമണിക്കൂർ കുറഞ്ഞത് 7 മണിക്കൂർ ഉറങ്ങിയിട്ട് മതി 5 എ എം ക്ലബ് ഒക്കെ.
ഉറക്കം ആരോഗ്യമാണെന്ന്, പറഞ്ഞ് തഴമ്പിച്ച ആ പഴയ
തള്ള്
വീണ്ടും വീണ്ടും
പറഞ്ഞു വയ്ക്കാതെ വയ്യ!
ഇന്നലെ കേട്ട ഒരു കഥ!
40 വയസ്സുകാരൻ
24 മണിക്കൂറിൽ 16 മണിക്കൂർ ജോലി.
നാലു മണിക്കൂർ ഉറക്കം
ഒരു മണിക്കൂർ നടത്തണം.
ആഹാരം കഴിക്കാനും കുളിക്കാനും പോലും സമയമില്ല.
ജോലിചെയ്യുന്ന 16 മണിക്കൂറിൽ ഏതാണ്ട് മുഴുവൻ ഭാഗവും കടുത്ത സ്ട്രസ്സ്.
രോഗങ്ങൾ വന്നപ്പോഴാണ് തിരിച്ചറിവ്.
ഉറക്കം
തലച്ചോറിനെയും
സർവ്വ നാഡി ഞരമ്പുകളെയും മനസ്സിനെയും സർവ്വതിനെയും
യുവത്വത്തിൽ തന്നെ നിലനിർത്തും .
എട്ടുമണിക്കൂർ 7 മണിക്കൂർ ഉറങ്ങിയില്ലെങ്കിൽ പിന്നെ രണ്ടു മണിക്കൂറോ അഞ്ചുമണിക്കൂറോ നടന്നിട്ടും ഒരു കാര്യവുമില്ല.
ഈ അടുത്തകാലത്ത് ഒരു സൂപ്പർസ്റ്റാറിന്റെ വീരവാദം കേൾക്കാനിടയായി.
അദ്ദേഹം അതിരാവിലെ രണ്ടുമണിക്ക് കിടന്നാലും നാലുമണിക്ക് ഓടാൻ പോകുമത്രേ.
സൂപ്പർസ്റ്റാർ സാർ ആയാലും എട്ടു മണിക്കൂർ ഉറങ്ങണം കുറഞ്ഞത് 7.
ഇല്ലെങ്കിൽ ദുഃഖിക്കേണ്ടി വരും
ഉറക്കത്തിന്റെ എല്ലാ ഘട്ടങ്ങളിലൂടെയും നല്ലോണം കടന്നുപോണം.
ഓർമ്മശക്തിയും ബുദ്ധിശക്തിയും ശരീരവും മനസ്സും സർവ്വതും രോഗവിമുക്തമാകും.
രോഗ പ്രതിരോധശേഷിയെങ്കിലും കൂടും.
ഇന്നലെയും കൂടി ഇമ്മ്യൂണിറ്റി കൂട്ടാൻ ഗുളിക തപ്പി ഒരു ഐടി ചേട്ടൻ എത്തിയിരുന്നു.
പോയി ഉറങ്ങടോ എന്ന് ഞാൻ പറഞ്ഞു
ഏറ്റവും വലിയ ഇമ്മ്യൂണിറ്റി ഗുളിക ഉറക്കമാണ്.
അതില്ലാതെ അതിരാവിലെ എണീറ്റ് നടന്നിട്ടും ഓടിയിട്ടും കാര്യമില്ല.
തരികിട ഇമ്മ്യൂണിറ്റി ഗുളിക കഴിച്ചിട്ടും കാര്യവുമില്ല.
ആദ്യം ഉറക്കം, പിന്നീട് നടത്തം! ഉറങ്ങാതെ ഓടുന്നവർ സൂക്ഷിച്ചോളൂ!..
ഡോ സുൽഫി നൂഹു.
