കാസർകോട്: വിവാഹ വാഗ്ദാനം നൽകി പീഡിപ്പിച്ച കേസിൽ നടൻ ഷിയാസ് കരീമിനെ ഇന്ന് കോടതിയിൽ ഹാജരാക്കും. നടനെ രാവിലെയോടെ കാസർകോട്ട് എത്തിച്ചു. ചന്ദേര പോലീസ് സ്‌റ്റേഷനിൽ എത്തിച്ച ഷിയാസിനെ ഹൊസ്ദുർഗ് കോടതിയിലാണ് ഹാജരാക്കുക.
ചെന്നൈ പോലീസിന്റെ കസ്റ്റഡിയിൽ ആയിരുന്നു ഷിയാസ്. തുടർന്ന് ഷിയാസിനെ കസ്റ്റഡിയിൽ എടുക്കാൻ കാസർകോട് പോലീസ് ചെന്നൈയിലേക്ക് തിരിക്കുകയായിരുന്നു. കേസിൽ ഷിയാസിന് കോടതി ഇടക്കാല ജാമ്യം അനുവദിച്ചിരുന്നു. എങ്കിലും പോലീസിന്റെ നടപടികൾ പൂർത്തിയാക്കേണ്ടതുണ്ട്. ഇതേ തുടർന്നായിരുന്നു പോലീസ് സ്‌റ്റേഷനിലെത്തിച്ചത്. നടന്റെ അറസ്റ്റ് പോലീസ് രേഖപ്പെടുത്തും. വൈദ്യപരിശോധന ഉൾപ്പെടെ നടത്തിയ ശേഷം രാവിലെ 11 മണിയോടെയാകും നടനെ കോടതിയിൽ ഹാജരാക്കുക.
വ്യാഴാഴ്ചയായിരുന്നു നടൻ പോലീസിന്റെ പിടിയിലായത്. കേസിൽ നടന് ലുക്ക് ഔട്ട് നോട്ടീസ് പുറപ്പെടുവിച്ചിരുന്നു. ഇതേ തുടർന്നായിരുന്നു ദുബായിൽ നിന്നും എത്തിയ നടനെ ചെന്നൈ വിമാനത്താവളത്തിൽ നിന്നും പിടികൂടിയത്.
Discussion about this post