പണ്ടുകാലങ്ങളിൽ മിക്ക വീടുകളിലും കുടിക്കാനായി ഉപയോഗിച്ചിരുന്നത് ജീരകവെള്ളം ആയിരുന്നു. എന്നാൽ കാലക്രമേണ ജീരകത്തിന്റെ സ്ഥാനത്ത് മാർക്കറ്റിൽ നിന്നും എളുപ്പത്തിൽ വാങ്ങാൻ കിട്ടുന്ന അനാരോഗ്യകരമായ ദാഹശമിനി പൊടികൾ വന്നെത്തി. എന്നാൽ ജീരകത്തിന്റെ മഹാത്മ്യം മനസ്സിലാക്കിയാൽ നിങ്ങൾ ഒരിക്കലും മറ്റ് ദാഹശമിനികളെ ആശ്രയിക്കില്ല എന്നുള്ളതാണ് സത്യം. ഇനി ദിവസം മുഴുവനും അല്ലെങ്കിലും രാവിലെ വെറും വയറ്റിൽ എങ്കിലും ജീരക വെള്ളം കുടിക്കുകയാണെങ്കിൽ നിങ്ങൾക്ക് ലഭിക്കാൻ പോകുന്ന ആരോഗ്യഗുണങ്ങൾ അതിശയിപ്പിക്കുന്നതാണ്.
നിരവധി പോഷകഗുണങ്ങൾ അടങ്ങിയിട്ടുള്ള ഒരു ഔഷധമായാണ് ജീരകം അറിയപ്പെടുന്നത്. വലുപ്പത്തിൽ കുഞ്ഞൻ ആണെങ്കിലും ഗുണത്തിന്റെ കാര്യത്തിൽ വലിയവനാണ് ഈ ജീരകം. പൊട്ടാസ്യം, ഇരുമ്പ് തുടങ്ങിയ ധാതുക്കൾ ധാരാളമായി ജീരകത്തിൽ അടങ്ങിയിട്ടുണ്ട്. പൊട്ടാസ്യം കൂടുതലായി അടങ്ങിയിട്ടുള്ളതിനാൽ തന്നെ രക്തസമ്മർദ്ദം കുറയ്ക്കാൻ ജീരകം സഹായകരമാണ്. വെറും വയറ്റിൽ തന്നെ ജീരകവെള്ളം കുടിക്കുന്നത് വണ്ണം കുറയ്ക്കാനും രോഗപ്രതിരോധശേഷി വർദ്ധിപ്പിക്കാനും സഹായിക്കുന്നതാണെന്ന് നിരവധി പഠനങ്ങൾ തെളിയിച്ചിട്ടുണ്ട്.
രക്തത്തിലെ പഞ്ചസാരയുടെ അളവ് നിയന്ത്രിക്കാനും ജീരകവെള്ളം സഹായകരമാണ്. കുറഞ്ഞ കലോറിയും കൂടുതൽ നാരുകൾ അടങ്ങിയിട്ടുള്ളതുമാണ് ജീരകവെള്ളം. രാവിലെ വെറും വയറ്റിൽ ജീരകവെള്ളം കുടിക്കുന്നത് ശരീരത്തിൽ കൊഴുപ്പ് അടിയുന്നത് ഇല്ലാതാക്കാനും സഹായിക്കും. ഇരുമ്പ് ധാരാളം അടങ്ങിയിട്ടുള്ളതിനാൽ വിളർച്ച പോലെയുള്ള പ്രശ്നങ്ങൾക്കും ജീരകവെള്ളം ഒരു ഉത്തമ പ്രതിവിധിയാണ്. കൂടാതെ ധാരാളം ആന്റി ഓക്സിഡന്റുകളും ജീരകത്തിൽ അടങ്ങിയിട്ടുണ്ട്. ഇത് ചർമം മൃദുലമായി സംരക്ഷിക്കാനും സഹായിക്കുന്നതാണ്.
Discussion about this post