മോസ്കോ : റഷ്യന് പ്രസിഡന്റ് വ്ളാഡിമിര് പുടിന് ഹൃദയാഘാതം മൂലം കുഴഞ്ഞ് തറയില് വീണെന്ന വാര്ത്ത വ്യാജമെന്ന് ക്രെംലിന്. പുടിന് സുഖമായി ഇരിക്കുന്നുവെന്നും ഗുരുതര ആരോഗ്യ പ്രശ്നങ്ങളുണ്ടെന്നത് കിംവദന്തി മാത്രമാണെന്നും ക്രെംലിന് വക്താവ് ദിമിത്രി പെസ്കോവ് അറിയിച്ചു. കൂടാതെ ആരോഗ്യ പ്രശ്നങ്ങള് കാരണം പൊതുവേദികളില് പുടിന് പകരം അപരനെ വച്ചെന്ന ആരോപണവും അദ്ദേഹം തള്ളി. അപരനാണ് പൊതു വേദിയില് പങ്കെടുത്തതെന്ന കിംവദന്തി കേട്ട് പുടിന് പൊട്ടിച്ചിരിച്ചതായും ക്രെംലിന് വക്താവ് വ്യക്തമാക്കുന്നു.
റഷ്യന് ടെലിഗ്രാം ചാനലായ ജനറല് എസ്.വി.ആര് ആണ് പുടിന് ഗുരുതരമായ ആരോഗ്യപ്രശ്നങ്ങളുണ്ടെന്നും ഹൃദയാഘാതം ഉണ്ടായതായും വാര്ത്ത പുറത്ത് വിട്ടത്. ഇത് പിന്നീട് പാശ്ചാത്യ മാദ്ധ്യമങ്ങള് ഏറ്റുപിടിക്കുകയായിരുന്നു. ഞായറാഴ്ച രാത്രിയോടെ പുടിന് ഹൃദയാഘാതം സംഭവിച്ചുവെന്നായിരുന്നു റിപ്പോര്ട്ട്. ക്രെംലിനില് മുന്പ് പ്രവര്ത്തിച്ചിരുന്ന വ്യക്തിയുടെ നേതൃത്വത്തിലുള്ളതാണ് ഈ ടെലഗ്രാം ചാനലെന്നും പറയപ്പെടുന്നു.
ഇന്നലെ വൈകീട്ട് ഏഴ് മണിയോടെയായിരുന്നു സംഭവം എന്നാണ് റിപ്പോര്ട്ടുകള്. കിടപ്പ് മുറിയ്ക്ക് സമീപമായി നിലത്ത് വീണു കിടക്കുന്ന നിലയില് അംഗരക്ഷകര് പുടിനെ കണ്ടുവെന്നാണ് വാര്ത്തകള് വന്നത്. വിശ്രമിക്കുകയായിരുന്ന അദ്ദേഹത്തിന്റെ മുറിയില് നിന്നും ശബ്ദം കേട്ട് അംഗരക്ഷകര് നടത്തിയ പരിശോധനയില് പുടിന് കണ്ണുകള് തുറന്ന് നിലത്ത് വീണുകിടക്കുന്ന നിലയില് കണ്ടെത്തുകയായിരുന്നു എന്നാണ് റിപ്പോര്ട്ടില് പറയുന്നത്.
71-കാരനായ പുടിന് അര്ബുദം, പാര്ക്കിന്സണ് എന്നീ രോഗങ്ങളുണ്ടെന്ന തരത്തില് കഴിഞ്ഞവര്ഷം മുതല് നിരവധി അഭ്യൂഹങ്ങളുണ്ട്. പൊതുവേദികളില് അനാരോഗ്യവാനായി പുടിനെ കാണപ്പെടുക കൂടി ചെയ്തതോടെ ഇത്തരത്തിലുള്ള അഭ്യൂഹം ശക്തമായി. എന്നാല് ഇതെല്ലാം നിഷേധിക്കുകയാണ് ക്രെംലിന്. പുടിന് അതീവ ആരോഗ്യവാനായിരിക്കുന്നുവെന്നാണ് ക്രെംലിന് നല്കുന്ന വിശദീകരണം.
Discussion about this post