ബീജിങ്: 8 വൈറസുകളെ കൂടി കണ്ടെത്തി ചൈനീസ് ഗവേഷകർ കോവിഡ്-19 ന് കാരണായ കൊറോണ വൈറസ് കുടുംബത്തിൽ ഉൾപ്പെടുന്ന വൈറസ് അടക്കമുള്ള എട്ട് വൈറസുകളെയാണ് ഗവേഷകർ കണ്ടെത്തിയത്. ചൈനീസ് ജേണലായ വൈറോളജിക്ക സിനിക്കയിലാണ് ഗവേഷണം പ്രസിദ്ധീകരിച്ചത്. കോവിഡിന്റെ ഉദ്ഭവവുമായി ബന്ധപ്പെട്ട് വിവാദത്തിലായ വുഹാൻ വൈറോളജി ഇൻസ്റ്റിറ്റ്യൂട്ടിലെ ഗവേഷണ കേന്ദ്ര ഡയറക്ടറായ ഡോ. ഷി ഴെങ്ലിയാണ് ജേണലിന്റെ എഡിറ്റർ.
ചൈനയുടെ തെക്കൻ തീരത്തിനടുത്ത് സ്ഥിതി ചെയ്യുന്ന ഹെയ്നാൻ ദ്വീപിലാണ് പുതിയ വൈറസുകളുടെ സാന്നിദ്ധ്യം കണ്ടെത്തിയത്. എലികളിലാണ് വൈറസുകൾ ഉള്ളത്. ഇവയ്ക്ക് മനുഷ്യനിലേക്ക് വ്യാപിക്കാൻ ശേഷി ലഭിച്ചാൽ മഹാമാരികൾക്ക് കാരണമാകുമെന്ന് ഗവേഷകർ മുന്നറിയിപ്പ് നൽകുന്നു.മഞ്ഞപ്പനി, ഡെങ്കി എന്നിവയ്ക്കു കാരണമാകുന്ന ഫ്ലാവിവൈറസുകളുടെ കുടുംബത്തിൽ പെടുന്ന പെസ്റ്റി, കടുത്ത പനിക്കു കാരണമാകുന്ന ആസ്ട്രോ , പാർവോ, ഗുഹ്യരോഗങ്ങൾ വരുത്തുന്ന പാപ്പിലോമ എന്നീ വിഭാഗങ്ങളിൽപെടുന്നവയാണു വൈറസുകൾ.മനുഷ്യരിൽ അവയുടെ സ്വാധീനം എന്തായിരിക്കുമെന്ന് കൃത്യമായി നിർണ്ണയിക്കാൻ വൈറസുകളിൽ കൂടുതൽ പരീക്ഷണങ്ങൾ നടത്താൻ ശാസ്ത്രജ്ഞർ ആവശ്യപ്പെട്ടിട്ടുണ്ട്.
2017 നും 2021 നും ഇടയിൽ ഹൈനാനിൽ നിന്ന് പിടിച്ചെടുത്ത വിവിധ എലികളിൽ നിന്ന് ശേഖരിച്ച സാമ്പിളുകൾ ഉപയോഗിച്ച് പുതിയ പഠനം വിശകലനം ചെയ്തു. ഈ സാമ്പിളുകൾ, പ്രത്യേക എലികളുടെ ഇനങ്ങളും ദ്വീപിലെ സ്ഥലവും അനുസരിച്ച് തരംതിരിച്ച ശേഷം, പരിശോധനയ്ക്കായി ലാബുകളിലേക്ക് അയച്ചു. എലികളിൽ നിന്ന് എടുത്ത 700 ഓളം സാമ്പിളുകളിൽ നിന്ന്് എട്ട് പുതിയ വൈറസുകൾ കണ്ടെത്തിയത് അപകടസാധ്യതയിലേക്കാണ് വിരൽ ചൂണ്ടുന്നത്.
