ഭക്ഷണം മരുന്ന് പോലെ കഴിച്ചില്ലെങ്കിൽ മരുന്ന് ഭക്ഷണം പോലെ കഴിക്കേണ്ടി വരുമെന്ന് പഴമക്കാർ പറയുന്നത് കേട്ടില്ലേ. സയൻസ് ലാബുകളിലെ പരീക്ഷണ നിരീക്ഷണങ്ങൾക്കൊടുവിലല്ല അവരീ നിർദ്ദേശം നൽകിയത് എന്നത് കൊണ്ട് മാത്രം അവയെ അവഗണിക്കരുത്. കാരണം കൃത്യമായ ഭക്ഷ്യവസ്തുക്കൾ ഡയറ്റിൽ ഉൾപ്പെടുത്തിയാൽ ഏറെ ഗുണകരമാണെന്ന് ഇന്ന് ശാസ്ത്രജ്ഞർ വരെ അടിവര ഇട്ട് പറയുന്നു.ചിലപ്പോഴൊക്കെ ഭക്ഷണത്തിൽ രുചിക്കായി ചേർക്കുന്ന ചേരുവകൾ അവയുടെ ഔഷധഗുണങ്ങൾ അറിയാതെ നമ്മൾ തള്ളിക്കളയാറുണ്ട്.
പാചകം ചെയ്യുമ്പോൾ മണത്തിനും രുചിക്കും വേണ്ടി ഭക്ഷണത്തിൽ ചേർക്കുന്ന വെളുത്തുള്ളിയുടെ ഗുണങ്ങളെക്കുറിച്ച് നോക്കാം.
വെളുത്തുള്ളിയിൽ ധാരാളം പോഷകങ്ങൾ അടങ്ങിയിട്ടുണ്ട്. വെളുത്തുള്ളിയിൽ വിറ്റാമിൻ ബി6, വിറ്റാമിൻ സി, സിങ്ക്, നാരുകൾ, കാൽസ്യം, മഗ്നീഷ്യം, സെലിനിയം,മാംഗനീസ് പോലുള്ള പോഷകങ്ങൾ നിറഞ്ഞതാണ്. വെളുത്തുള്ളിക്ക് ആൻറി-ഇൻഫ്ലമേറ്ററി ഗുണങ്ങൾ, ആന്റിമൈക്രോബയൽ ഗുണങ്ങൾ, ആൻറി ഫംഗൽ ഗുണങ്ങൾ എന്നിവയും ഉണ്ട്. ഔഷധഗുണമുള്ളതിനാൽ മിക്ക രാജ്യങ്ങളിലെയും മിക്കവാറും എല്ലാ പാചകരീതികളിലും ഇത് ചേർക്കുന്നു.
കൊളസ്ട്രോൾ കുറയ്ക്കാൻ വെളുത്തുള്ളി വളരെ നല്ലതാണ്. അതുകൊണ്ട് തന്നെ ഹൃദയസ്തംഭനവും ഹൃദ്രോഗവും കുറയ്ക്കാനും ഇവ സഹായിക്കും. ശുദ്ധമായ വെണ്ണ രക്തത്തിന്റെ കട്ടി കൂട്ടുകയും കൊളസ്ട്രോൾ ഉയർത്തുകയും ചെയ്യും . ഇത് രക്തധമനികൾ കട്ടിയാകുന്നതിനും കനം വയ്ക്കുന്നതിനും കാരണമാകും. ഇത്തരം മാറ്റങ്ങൾ ഉണ്ടാകുന്നത് വെളുത്തുള്ളി തടയും.
2. ശരീരത്തെ വിഷവിമുക്തമാക്കാൻ സഹായിക്കുന്ന ഏറ്റവും മികച്ച ആഹാര പദാർത്ഥങ്ങളിൽ ഒന്നായാണ് വെളുത്തുള്ളിയെ കരുതുന്നത്. പരാദങ്ങളെയും വിരകളെയും അകറ്റാനും പകർച്ചപ്പനി, പ്രമേഹം, വിഷാദം, ചിലതരം അർബുദങ്ങൾ എന്നിവ പ്രതിരോധിക്കാനുമുള്ള ശക്തി വെളുത്തുള്ളിക്കുണ്ട്.
3. ഭക്ഷണത്തിൽ വെളുത്തുള്ളി ചേർത്ത് കഴിക്കുന്നത് ദഹനത്തെ സഹായിക്കുകയും വയറിന് സുഖം പകരുകയും ചെയ്യും.വില്ലൻ ചുമ, കണ്ണുവേദന, വയറുവേദന എന്നിവയ്ക്ക് പറ്റിയ ഔഷധമാണ് വെളുത്തുള്ളി .കൂടാതെ, ഗ്യാസ് ട്രബിളിന് വെളുത്തുള്ളി ചതച്ച് പാലിൽ കാച്ചി ദിവസവും രാത്രി കഴിക്കുന്നത് ഫലപ്രദമാണ്.
4. വെളുത്തുള്ളി, കായം, ചതകുപ്പ ഇവ സമം പൊടിച്ച് ഗുളികയാക്കി ചൂടുവെള്ളത്തിൽ ദഹനക്കേടിന് കഴിക്കാവുന്നതാണ്. വെളുത്തുള്ളി പിഴിഞ്ഞ നീരിൽ ഉപ്പുവെള്ളം ചേർത്ത് ചൂടാക്കി ചെറുചൂടോടെ മൂന്ന് തുള്ളി വീതം ചെവിയിൽ ഒഴിച്ചാൽ ചെവിവേദനക്ക് ശമനമുണ്ടാകും
5.രാവിലെ വെറും വയറ്റിൽ വെളുത്തുള്ളി കഴിക്കുന്നത് ശരീരത്തിലെ ചീത്ത കൊഴുപ്പ് നീക്കി രക്തം ശുദ്ധീകരിക്കും. ആന്റിഓക്സിഡന്റ് ഗുണങ്ങളാൽ വെളുത്തുള്ളി രക്തസമ്മർദ്ദവും രക്തത്തിലെ പഞ്ചസാരയും നിയന്ത്രണത്തിലാക്കുന്നു. വെളുത്തുള്ളിയിൽ അലിസിൻ എന്ന സംയുക്തം അടങ്ങിയിട്ടുണ്ട്. ഇത് നിങ്ങളുടെ ശരീരത്തിലെ പാൻക്രിയാസിന്റെ പ്രവർത്തനത്തെ ഉത്തേജിപ്പിക്കുക മാത്രമല്ല ശരീരത്തിന് ആവശ്യമായ ഇൻസുലിൻ സ്രവണം വർദ്ധിപ്പിക്കുകയും ചെയ്യുന്നു. ഇത് പ്രമേഹ സാധ്യത കുറയ്ക്കുന്നു.
വെളുത്തുള്ളിയിൽ അലിസിൻ സംയുക്തം ധാരാളം അടങ്ങിയിട്ടുണ്ട്. ഇത് അധികമായി കഴിക്കുമ്പോൾ വിഷാംശത്തിന്റെ അളവ് കൂടുകയും കരളിന് തകരാർ സംഭവിക്കുകയും ചെയ്യുന്നു.
വെളുത്തുള്ളിയിലെ രാസവസ്തുക്കൾ വായ് നാറ്റത്തിന് കാരണമാകും. വെളുത്തുള്ളി അമിതമായി കഴിക്കുന്നത് ചൊറിച്ചിൽ, ചർമ്മത്തിലെ ചുണങ്ങു തുടങ്ങിയ ചർമ്മ പ്രശ്നങ്ങൾക്കും കാരണമാകും. പച്ച വെളുത്തുള്ളി കഴിക്കുന്നത് തലവേദനയ്ക്ക് കാരണമാകും.
Discussion about this post