വെറും മുഖക്കുരു അല്ലെങ്കിലോ?; ഇവയെല്ലാം മറ്റ് ചില ചർമ്മ രോഗങ്ങളാവാം; ഈ കാര്യങ്ങൾ ശ്രദ്ധിക്കൂ

സൗന്ദര്യപരിപാലനത്തിൽ മുഖക്കുരു വലിയ പ്രശ്‌നമാണ് സൃഷ്ടിക്കുന്നത്. തിളക്കമേറിയ ചർമ്മമോ തുടുത്ത കവിളുകളോ ഒന്നും വേണ്ട ഈ മുഖക്കുരു ഒന്ന് മാറി കിട്ടിയാൽ മതിയെന്ന് പരിതപിക്കുന്നവരുണ്ട്. ഇത് വിഷാദം അപകർഷതാ ബോധം, ആത്മവിശ്വാസക്കുറവ് എന്നിവയ്ക്ക് കാരണമാകുന്നു.

എന്താണ് മുഖക്കുരു

രോമം, രോമകൂപം, രോമം എഴുന്നുനിൽക്കാൻ സഹായിക്കുന്ന അറെക്ടോറെസ് പിലോറം എന്ന ഇത്തിരിക്കുഞ്ഞൻ മാംസപേശി, ത്വക്കിന് മെഴുക്ക്മയം നൽകുന്ന സീബം ഉത്പാദിപ്പിക്കുന്ന സ്‌നേഹഗ്രന്ഥി- ഇത്രയും ചേർന്നതാണ് നമ്മൾ പുറമേ കാണുന്ന ‘വെറും രോമ’ത്തിന്റെ ഘടന. ഇതിനെ ഫിലോസ്‌ബെഷ്യസ് യൂണിറ്റ് എന്ന് പറയുന്നു

മുഖക്കുരു ഈ ഫിലോസ്‌ബെഷ്യസ് യൂണിറ്റിനെ ബാധിക്കുന്ന ഒരു രോഗമാണ്. ചർമത്തിലെ രോമകൂപങ്ങളിലെ കോശങ്ങളിൽ സംഭവിക്കുന്ന മാറ്റങ്ങൾ മൂലം രോമകൂപങ്ങളുടെ സുഷിരങ്ങളിൽ തടസ്സം നേരിടുന്നതാണ് ഇവിടുത്തെ പ്രധാന പ്രശ്‌നം. അതോടൊപ്പം തന്നെ സ്‌നേഹഗ്രന്ഥികളുടെ അമിതപ്രവർത്തനം മൂലം രോമകൂപങ്ങളിൽ സീബവും ചർമ്മത്തിലെ കോശങ്ങളും അടിഞ്ഞു കൂടുകയും ചെയ്യുന്നു. ഇത് ചർമ്മത്തിൽ സ്വാഭാവികമായി തന്നെ കണ്ടു വരുന്ന പ്രൊപ്യോനിബാക്ടീരിയം അക്‌നെസ് എന്ന ബാക്ടീരിയയുടെ അമിതപ്രജനനത്തിനും ഫിലോസ്‌ബെഷ്യസ് യൂണിറ്റിന്റെ നീർവീക്കത്തിനും വഴിയൊരുക്കുന്നു. ഇതെല്ലാമാണ് മുഖക്കുരുവിലേക്ക് നയിക്കുന്നത്.

സെബേഷ്യസ് ഗ്രന്ഥികൾ വീർത്ത് മുഖത്ത് കുരുക്കൾ പ്രത്യക്ഷപ്പെടുകയും ചെയ്യുന്നു. ഇതാണ് മുഖക്കുരുവിന്റെ ആദ്യ ഘട്ടം. ഇവയെ കാര (Comedones) എന്ന് വിളിക്കുന്നു. ചർമപ്രതലത്തിലെ സുഷിരങ്ങൾ അടഞ്ഞിരുന്നാൽ വെളുത്ത് കാണപ്പെടുന്ന കാരകളെ വൈറ്റ്ഹെഡ്സ് (Whiteheads) എന്നും സുഷിരങ്ങൾ തുറന്ന അവസ്ഥയിൽ കറുത്ത് കാണപ്പെടുന്ന കാരകളെ ബ്ലാക്ക് ഹെഡ്സ് (Blackheads) എന്നും വിളിക്കുന്നു. ക്യൂട്ടിബാക്ടീരിയം അക്നെസ് പോലുള്ള രോഗാണുബാധമൂലം മുഖക്കുരു പഴുക്കുകയും അവ ഉണങ്ങിയാലും കലകളും വടുക്കളും അവശേഷിക്കുകയും ചെയ്യുന്നു.

സൗന്ദര്യവർധക ഉത്പന്നങ്ങളുടെ അമിതോപയോഗം മുഖത്ത് കാരകൾ ഉണ്ടാകാൻ കാരണമാകാറുണ്ട്. (Cosmetic acne / Acne Venenata). ജോലി സംബന്ധിയായ കാരണങ്ങളാൽ ചില രാസപദാർഥങ്ങളുമായി സമ്പർക്കത്തിൽ വരുന്നവർക്കും കുരുക്കൾ ഉണ്ടാകാം (occupational acne). പെട്രോളിയം ഉത്പന്നങ്ങൾ, കോൾ ടാർ (Tar acne), ആരോമാറ്റിക് സംയുക്തങ്ങൾ മുതലായവ ഉദാഹരണങ്ങളാണ്. ചൂടും, ഈർപ്പവും കൂടുതൽ ഉള്ള കാലാവസ്ഥയിൽ (Tropical acne) ചിലപ്പോൾ മുഖക്കുരുക്കൾ പ്രത്യക്ഷപ്പെടാം. അമിത ക്ഷാരഗുണമുള്ള ഡിറ്റർജന്റ് ഉപയോഗം (Detergent acne), ഇടയ്ക്കിടെ തൊലിയിൽ ഉണ്ടാകുന്ന ഉരസൽ, അനാവശ്യമായി മുഖം ഉരച്ചുകഴുകുന്ന രീതി എന്നിവയെല്ലാം മുഖക്കുരു ഉണ്ടാകാൻ കാരണമാകാറുണ്ട്.

വളരെ അപൂർവമായി പനിയും, മറ്റ് ശാരീരിക അസ്വാസ്ഥ്യങ്ങളും ആഴമേറിയ മുഖക്കുരുക്കൾ ഉണ്ടാകാൻ കാരണമാകാറുണ്ട് (Acne fulminans / acne Maligna).

ഗ്ലൈസിമിക് ഇൻഡക്‌സ് കൂടിയ ഭക്ഷണപദാർഥങ്ങളും പാലും പഞ്ചസാരയും പാലുത്പന്നങ്ങളും ചിലരിൽ മുഖക്കുരുവിന് കാരണമാകാം.

പി.സി.ഒ.എസ്, അണ്ഡാശയ മുഴകൾ, പുരുഷഹോർമോൺ പുറപ്പെടുവിക്കുന്ന ട്യൂമറുകൾ, ചില മരുന്നുകളുടെ പാർശ്വഫലം തുടങ്ങിയ കാരണങ്ങൾകൊണ്ട് മുഖക്കുരു പ്രത്യക്ഷപ്പെടാം. ഈ സാഹചര്യത്തിൽ ഡോക്ടറുടെ ഉപദേശപ്രകാരം ഹോർമോൺ പരിശോധനകളും സ്‌കാനിങ്ങും മറ്റ് പരിശോധനകളും ചെയ്യേണ്ടതാണ്.

മുഖക്കുരു എന്ന് സാധാരണ ആളുകൾ കരുതുന്നത് യഥാർഥത്തിൽ മറ്റുചില ചർമരോഗങ്ങളാകാം. ഹൈഡ്രഡിനൈറ്റിസ് സപ്പുററ്റിവ, ട്യൂബറസ് സ്‌ക്‌ളീറോസിസ് മുതലായവ ഉദാഹരണം

മുഖക്കുരുവിന്റെ തീവ്രതകൂടിയ അവസരങ്ങളിൽ ഡോക്ടറുടെ ഉപദേശപ്രകാരം ആന്റിബയോടിക്, ഹോർമോൺ, റെറ്റിനോയ്ഡ് ഗുളികകൾ കഴിക്കേണ്ടിവന്നേക്കാം